सगरमाथाय् थानाच्वंगु लाश क्वत हइगु

येँ (सन्ध्या टाइम्स)/सगरमाथा गयेबलय् दकलय् थाकुगु थाय् धाइगु साउथ कोलय् सिनाः अथें लानाच्वंगु लाशया ल्याः ३०० गू थ्यंगु दु। सगरमाथाया ८००० मिटरया उचाईलय् सुं मनू सित धाःसा अनं लाश ज्वनाः कुहां वयेगु सम्भावना हे मदु। अय् जूगुलिं आरोहीतय्सं सीम्ह थः पासाया लाश अन हे वांछ्वया थकीगु खः। सगरमाथा गइबलय् दकलय् अप्वः मनू सीगु थाय् नं थ्वहे खः। अय् जूगुलिं थ्व लागायात 'डेथ जोन' नं धायेगु याः ।

आः सगरमाथा सफाई अभियानय् उखे वनेत्यंपिं आरोहीतय्सं 'डेथ जोन' य् लानाच्वंगु लाशत नं क्वत हयेगु ज्या याइ धाःगु दु। तर उमिसं फुक्कं लाश धाःसा हये फइ मखु। थ्व पुचलं अनं अथे न्याम्ह ति मनूतय् लाश हयेगु ग्वसाः ग्वःगु दु। साउथ कोलं सगरमाथाया च्वकाय् वनेगु लँपुइसं मछिंक लानाच्वंगु न्याम्हेसिया लाश हयेगु ग्वसाः उमिसं दयेकूगु खः। अन लानाच्वंगु मेमेगु लाश क्वत हयेगु धाःसा सम्भव हे मजुइगु खँ नं धाःगु दु। थ्व पुचलं अन मुनाच्वंगु ६,६०० पाउण्ड फोहोर क्वत हयेगु ताः तःगु दु ।