थनिंनिसें निजी विद्यालय बन्द
येँ (सन्ध्या टाइम्स)/एकीकृत माओवादीया भ्रातृ संगठन अखिल क्रान्तिकारीं थनिंनिसें देय्न्यंकंया च्याद्वलं मल्याक निजी स्कूल बन्द याना बिउगु दु। थुकिं यानाः द्वलंद्वः विद्यार्थीतय् ब्वनेज्या प्रभावित जूगु दु। निजी स्कूलतय्सं २५ प्रतिशत सिबें अप्वः काःगु शुल्क लित बीमाः धइगु माग यासें अखिल क्रान्तिकारीं उगु कथं थनिंनिसें बन्द आह्वान याःगु खः ।
संघीय गणतान्त्रिक नेपाःया संविधान निर्माण जू वनाच्वंगु इलय् आःया निंतिं खुला तक न्हापाया हे शुल्क यथावत तयाः थकाये दइ मखु धकाः इनाप यानाः नं निजी स्कूलतय्गु संगठन प्याब्सन व एन प्याब्सनं थः मं दुथें भाः थकयाः फुक्क निजी स्कूलय् सर्कुलर जारी यानाः भाः थकायेके बिउगुलिं हे बाध्य जुयाः थःपिंसं आन्दोलन यायेमाःगु खः धकाः अखिल क्रान्तिकारीया न्वकु जागृत रायमाझीं धयादीगु दु। अधिकार हे मदुगुयात छ्यलाः शुल्क अप्वयेकेगु ज्या याःगुलिं हे वंगु ६ गतेनिसें स्कूलया लेखा शाखाय् तालं ग्वयागु नापं अथे तालं ग्वयाः नं बेवास्ता यानाः मेगु हे थासय् च्वनाः न्हू भर्ना कयाच्वंगु स्कूलया बस व स्कूलय् विद्यार्थीतय्सं तोडफोड याना बिउगु खः धकाः नं वय्कलं धयादीगु दु ।
उखे निजी स्कूलतय्सं धाःसा क्रान्तिकारी विद्यार्थीं शुल्क लित बीमाः धाःसां नं कायेधुंकूगु शुल्क थःपिंसं लित बीगु अवस्था मदु धाःगु दु। थुकिं यानाः विद्यालय बन्दया थ्व ज्याझ्वः ताःहाकः जुया वनीगु खतरा ब्वलंगु खँ धाःगु दु ।
