नेवाः अर्थनीति बारे सहलह
येँ (सन्ध्या टाइम्स)/नेपाः व नेवाः प्रदेशया न्हूगु अर्थनीति बारे सहलह यायेत नेपाः राष्ट्रिय पार्टीं म्हिगः थन छगू ज्याझ्वः यात। पुलांम्ह व्यवसायी उत्तम धाख्वाः स्रोत व्यक्ति कथं झाःगु उगु ज्याझ्वलय् न्ववासें राजनीतिक पार्टी व कर्मचारीतय्सं श्रमिकतय्त गलत रुपं उपयोग यानाच्वंगु खँ कनादिल। लिसें वय्कलं ग्रामिण अर्थतन्त्र व शहरी विकासया न्हूगु अवधारणा बारे नं अन चर्चा यानादीगु खः ।
नेपाः राष्ट्रिय पार्टीया नायः डा. केशवमान शाक्यया सभापतित्वय् जूगु उगु ज्याझ्वलय् उद्यमी व्यवसायीपिं डा. हेरम्बबहादुर राजभण्डारी, सुगतरत्न कंसाकार, हिराकाजी मानन्धर, मोतिलाल शिल्पकार आदिपिंसं नं नुगःखँ प्वंकादीगु खः। ज्याझ्वलय् पार्टीया मू छ्यांज्ये विजय सैंजुं लसकुस यानादीगु खः ।
