अग्नि पीडितयात मनपाया राहत
येँ (सन्ध्या टाइम्स)/ताहाननीइ छेँ मिं नयाः पीडित जूपिंत येँ महानगरपालिकां राहत स्वरुप न्यागू लाख तका दां बिउगु दु। म्हीग छगू ज्याझ्वःया दथुइ मनपाया सहायक कार्यकारी अधिकृत दीपक कोइरालां न्यागू लाख तकाया चेक ताहाननी अग्नि पीडित राहत संकलन समितिया संयोजक चन्द्रानन्द नेवाःयात लःल्हाना दीगु खः ।
आः तक उगु कोषय् गुंगू लाख स्वद्वः गुसः व न्यय्न्यातका दां मुंगु खँ समितिं धाःगु दु। चेक लःल्हायेगु ज्याझ्वलय् येँ मनपाया राजनीतिक संयन्त्रया दुजःपिं माओवादीया सर्वोत्तम डंगोल, नेकांया ध्यानगोविन्द रंजित व एमालेया बसन्त मानन्धरपिंसं नुगःखँ तयादीगु खः। ज्याझ्वः समितिया संयोजक चन्द्रानन्द नेवाःया सभापतित्वय् जूगु खः ।
