उर्जा विकासय् एडीबीं ग्वाहालि याइगु
येँ (सन्ध्या टाइम्स)/नेपाःया उर्जा विकासया निंतिं एशियाली विकास बैंक (एडीबीं) ग्वाहालि याइगु जूगु दु ।
नेपाल सरकारया वैकल्पिक व नवीकरणीय उर्जाया दिगो विकासया निंतिं थःपिंसं बियागु प्रतिवद्धता सफल यायेत पूर्ण रुपं ग्वाहालि याये त्यनागु खँ एडीबीया उपाध्यक्ष जिओ योओयुं जानकारी बियादीगु दु ।
स्वन्हुया निंतिं नेपाःया भ्रमणय् वयाच्वनादीम्ह एडीबीया उपाध्यक्षं योओयुं विशेष यानाः ग्रामिण लागाया गरीब परिवारय् सेवा विस्तार यायेत व वैकल्पिक व नवीकरणीय उर्जाया विकासय् थुगु ग्वाहालियात निरन्तरता बीगु निंतिं नं एडीबीं ग्वाहालि यायेत्यनागु खँ धयादीगु दु ।
एडीबी उपाध्यक्ष योओयुं नेपाः भ्रमणया झ्वलय् प्रधानमन्त्री माधवकुमार नेपाल, अर्थमन्त्री सुरेन्द्र पाण्डे, राष्ट्रिय योजना आयोगया उपाध्यक्ष डा. जगदिशचन्द्र पोखरेलया लिसें नेपाल सरकारया उच्च पदस्थ कर्मचारीत लिसे नं नेपाःया उर्जा विकासया बारे विशेष सहलह ब्याकादीगु खः ।
नेपाःया सरकारी अधिकारीत लिसे उर्जा विकासया निंतिं जूगु सहलहं थःत तसकं उत्साहित योओयूं धयादीगु दु। एडीबीं पित बिउगु 'सकसितं उर्जा' धइगु नारायात सफल यायेत बैंकया सकल दुजः देय्यात सदां ग्वाहालि यायेत तयार दुगु नं धयादीगु दु ।
सरकारया उच्च पदाधिकारत लिसे जूगु वार्तां वैकल्पिक व नवीकरणीय उर्जा विकासया निंतिं नेपाः पाइलटया रुपय् छनौट जूगु नं उपाध्यक्ष योओयू स्पष्ट यानादीगु दु। सोलार, साना वायु उर्जा केन्द्र, वायोग्यास, लघु जलविद्युतया विकास व विस्तारय् आपालं अवसरत दुगु व थुकिं नेपाःया गरिबी न्हंकेत महत्वपूर्ण योगदान बीगु नं वय्कलं धयादीगु दु ।
लिसें उर्जा विकासया निंतिं सरकारया यकःति कुतलं जक छुं नं मजुइगुलिं निजी ख्यलं साझेदारीया भूमिका म्हितेमाःगु खँय् वय्कलं बः बियादीगु दु ।
