प्रचण्डया विकल्प दुसाः सहमति जुइफु : प्रम
प्रधानमन्त्री माधवकुमार नेपालं माआवादी अध्यक्ष पुष्पकमल दाहाल 'प्रचण्ड'या विकल्प कथं प्रधानमन्त्रीया निंतिं नां वःसा सहमति जुइफुगु खँ धयादीगु दु । वय्कलं धयादिल, 'प्रधानमन्त्रीया निंतिं प्रचण्डया विकल्प वःसा बिचाः यायेफइ ।'
सुर्खेतय् माओवादी आक्रमणय् लाना: घाःपाः जुपिं एमालेया कार्यकर्तातय्त नापलायेत येँया त्रिवि शिक्षण अस्पताल थ्यंकादीम्ह प्रधानमन्त्री नेपालं पत्रकारत नाप खँल्हाबंला यानादिसें माओवादीं हिंसा मत्वःतुगुलिं हे वर्तमान समस्या वःगु धयादिसें माओवादीं हिंसा मत्वःतुसाः दक्वं दलत मिले जुयाः माओवादीयात बहिष्कार यायेगु ख्याच्वः बियादिल ।
माओवादी संविधान च्वयेगु व शान्ति प्रकृयाप्रति प्रतिवद्ध मजूगु द्वपं बियादिसें प्रधानमन्त्री नेपालं संवैधानिक परिषदया बैठकय् माओवादीयात सःतुसां अनुपस्थित जूगुलिं बाध्य जुया: संवैधानिक निकायलय् नियुक्ति यायेमाःगु धयादिल ।
छुं दिं न्ह्यः सुर्खेतय् माओवादी आक्रमणय् लानाः नीम्हं मल्याक एमाले कार्यकर्तात घाःपाः जूगु खः । घाःपाः जूपिं छुं कार्यकर्तायात सुर्खेतय् वासः याकातःगु दुसाः मेपिंत येँया शिक्षण अस्पतालय् वासः याकातःगु दु ।
