देय्न्यंकया निजी शिक्षण संस्था ठप्प
वार्ताय् वसा: सरकरां मध्यस्थता यानाबी : शिक्षा मन्त्री
निजी विद्यालयतय्सं न्हूगु शैक्षिक सत्रनिसें शुल्क अप्वयेकूगु विरोधय् एनेकपा (माओवदी) सम्बद्ध विद्यार्थी संगठन अखिल (क्रान्तिकारीं) आइतवाः याःगु निजी विद्यालय बन्दया कारणं देय्न्यंका शिक्षण संस्था ठप्प जूगु दु । शुल्क वृद्धिया विरोधय् वैशाष ६ गते निसें निजी विद्यालयया लेखाशाखाय् तालाबन्दी यानावयाच्वंगु क्रान्तिकारीं थनिनिसें देय्न्यंकया विद्यालय बन्दया आह्वान याःगु खः । बन्दया कारणं देय्न्यंकया निजी शिक्षण संस्थाया पठन पाठन ठप्प जूगु दु ।
उखे शिक्षामन्त्री सर्वेन्द्रनाथ शुक्लां अनिश्चितकालीन निजी विद्यालय बन्द ज्याझ्वः तत्काल लितकयाः वार्ता मार्फत समस्या ज्यंकेत आन्दोनरत विद्यार्थी संगठनयात इनाप यानादीगु दु । वय्कलं विद्यार्थीत वार्ताय् च्वनेत तयार जुसाः निजी विद्यालय व विद्यार्थीत दथुइया वार्ताय् सरकरां मध्यस्थता यानाबीगु धयादिल । नापं वय्कलं विद्यार्थीतय् आन्दोलन शुल्क वृद्धि विरोधय् मजुसें माओवादीं यायेत्यंगु आन्दोलनयात ध्यानय् तयाः याःगु ज्याझ्वः जूगु द्वपं नं बियादिल ।
