सहलह पाखें हे सहमतिलय् वने : प्रधानमन्त्री
प्रधानमन्त्री माधवकुमार नेपालं द्वपं बीगू स्वयां बहस व सहलह पाखें सहमतिलय् वनेत इनाप यानादीगु दु । वय्कलं सहमतिया यात्राय् हाथ्या अप्वयावंगु धयादिसें थुकीया फाइदा कयाः पुरातनवादी शक्तितय्सं छ्योँ ल्ह्वनेगु दुष्प्रयास यानाच्वंगु धयादिल ।
लोकतन्त्र दिवसया लसताय् शनिवाः येँया तिंख्यलय् ग्वसाःग्वःगु ज्याझ्वलय् वय्कलं जनताय् नं आशंका व अन्यौला अप्वयावंगु धयादिसें दलत दथुइ सहमति, सहकार्य व एकतां उकीयात चीकेमाःगु धयादिल । वय्कलं थंज्याःगु कुतःलं न्हापाः नं असम्भव थें खनेदुगु ज्या नं सम्पन्न जूगु न्ह्यथंनादिसें दलत दथुइ कार्यशैली व बिचाः पाःसां लोकतन्त्रयात संस्थागत यायेगु व जनचहाना कथं न्हूगु संविधान जारी यायेत छप्पँ जुइमाःगु धयादिल ।
वय्कलं पुलांगु सहमतियात इमान्दारीया साथ पालना यायेत अन्तर्राष्ट्रिय मूल्य, मान्यता व जनतया शान्तिया आकांक्षायात सम्मान यायेत माओवादीयात इनाप यानादिल । माओवादी लडाकु समायोजन व पुनःस्थापना यायेगु ज्या सम्पन्न यानाः शान्ति प्रकृयायात निष्कर्षय् थ्यंकेधुंकाः जक संविधान जारी यायेगु खँ नं वय्कलं धयादिल ।
प्यदँ न्ह्यः लोकतान्त्रिक आन्दोलनं शान्तिपूर्ण जनआन्दोलन मार्फत जनतां चाहे जूगु परिवर्तन सम्भव जूगु दसि ब्यूगु धयादिसें उगु इलय् जनता नाप ल्वाभः व सशस्त्र जत्था नं मदुसां जनता नाप पूर्ण विश्वास व भरोसा दुगुलिं आन्दोलन सफल जुयांतुं त्वःतुगु धयादिल ।
लोकतन्त्र दिवस मूल समारोह समितिं ग्वसाःग्वःगु उगु ज्याझ्वलय् राष्ट्रपति डा. रामवरण यादव, उपराष्ट्रपति परमानन्द झा, संविधानसभाया अध्यक्ष सुवास नेम्वाङ लगायत संवैधानिक निकयाया प्रमुखत, मन्त्रीत, कुटनीतिक नियोगया अधिकारीतय् ब्वति दुगु खः ।
