सरकारं भ्रम ब्वलंकाः दमन यायेत स्वयाच्वन : माओवादी
एकीकृत नेकपा (माओवादीं) शान्ति व न्हूगु संविधानया निंतों जनदवाव बीत यायेत्यंगु आन्दोलनया बारे सरकारं भ्रम ब्वलंकाः दमन यायेगु षड्यन्त्र यानाच्वंगु द्वपं ब्यूगु दु ।
शनिवाः माओवादी अध्यक्ष पुष्पकमल दाहाल 'प्रचण्ड'या न्हू बजारय् दुगु निवासय् च्वंगु केन्द्रीय पदाधिकारीतय् बैठकं आन्दोलनयात शान्तिपूर्ण रुपय् क्वचायेकेगु बारे पार्टीं स्पष्ट यायेधुंकूसां सरकारं वक्तव्यवाजी यानाः उत्तेजना ब्वलंकेत स्वःगु द्वपं ब्यूगु दु ।
बैठकं शान्ति व न्हूगु संविधानया निंतिं राष्ट्रिय सहमतिया सरकार धइगु नारा ज्वनाः बैशाष १८ गते पार्टीं यायेत्यंगु जनप्रदर्शनया ज्याझ्वःयात सरकारं गलत व्याख्या यायेगु व जनतायात भ्रम ब्वलंकूगुलिं अज्याःगु सरकारी षड्यन्त्रया बारे स्पष्ट यायेमाःगु निष्कर्ष नं पिकाःगु दु ।
अथेहे संवैधानिक परिषदं शुक्रवाः याःगु नियुक्ति असंवैधानिक जूगु धासें उकीयात लितकायेत सरकार नाप माग याःगु दु ।
