एमालेया च्याक्वःगु राष्ट्रिय महाधिवेशन

प्रधानमन्त्री पुष्पकमल दाहाल प्रचण्डं प्रतिक्रान्तिकारीतय्सं देशय् दुर्घटना हयेत स्वःगुिलं राष्ट्रियता खतराय् लानाच्वंगु धयादीगु दु । नेकपा एमालेया थौंनिसें बुटवलय् न्ह्याःगु च्याक्वःगु राष्ट्रिय महाधिवेशनया उलेज्या ज्याझ्वलय् न्वंवानादिसें वय्कलं जनयुद्ध व जनआन्दोलनया समायोजनपाखें देशय् गणतन्त्र पलिस्था जुयाः दयेकूगु वर्तमान सरकार क्वःदःसा देशय् तःधंगु दुर्घटना वइगु धयादीगु दु । देय् थ्व इलय् गंभीर संकटय् दुगु इलय् नेकपा एमालेयात न्ह्याथें यानाःसां दक्षिणपन्थी दयेकेत प्रतिक्रान्तिकारीतय्सं कसरत यानाच्वंगु धयादिसें प्रधानमन्त्री प्रचण्डं उकिपाखें तापायेत एमालेयात सुझाव बियादीगु दु । आः एमाले व माओवादीदथुइ ल्वापुयायेत प्रतिगामीत न्ह्यज्यानाच्वंगु शंका यासें वय्कलं देशय् कम्युनिष्ट केन्द्र पलिस्था यायेगु लँपुइ आः माओवादी व एमालें सहकार्य यायेमाःगु धयादीगु दु । न्ह्यः वा लिपा जूसां देशय् छगू हे कम्युनिष्ट केन्द्र पलिस्था जुइगु प्रधानमन्त्री प्रचण्डया विश्वास दु । देशय् सहमतीय राजनीतियात बहुदलीय राजनीतिपाखें यंकेगु ज्या काँग्रेसं याःगु धयादिसें प्रधानमन्त्री प्रचण्डं काँग्रेस सभापति गिरिजाप्रसाद कोइरालायात म्हुतुं धाथें सहकार्यया कार्यशैली व्यवहारय् क्यनेत नापं इनाप यानादीगु दु ।
थथेहे स्वकीय छ्यााजे शक्तिबहादुर बस्नेतयात गोली कयेकलं नं तःधंगु राजनीतिक दलतय्सं छु नं प्रतिकि्रया मब्यूगु खँय् वय्कलं तःधंगु दलतय्गु ध्यानाकर्षण यानादीगु दु । अथेहे महाधिवेशनया उलेज्या समारोहसं न्वंवानादिसें नेपाली कांगे्रसया सभापति गिरिजाप्रसाद कोइरालां थौंनिसें देशय् सहमतिया राजनीति सहमति न्ह्याःगु घोषणा यानादीगु दु । एकता सहमति व सहकार्यया आः विकल्प मदुगु धयादिसें वय्कलं संविधानसभाया निर्वाचनलिपा दथुइ अन्यौलया स्थिति सिर्जना जूसां नं सहकार्य व सहमति न्ह्याबलें माःगु धयादीगु दु । छिमेकी राष्ट्रत सकारात्मक जूसा नेपाःया शान्ति व समृद्धियात सुनां नं छुं यायेमफइगु धयादिसें चीन व भारतयात नेपाःप्रति सकारात्मक दयेकेमाःगु बिचाः प्वंकादीगु दु । नेकपा एमालें थःगु महाधिबेशनय् फुक्क राजनीतिक दलया नेतातय्त सःताः सहमतिया राजनीतियात न्ह्यःने न्ह्याकूगु न्ह्यथनादिसें वय्कलं संविधान निर्माणय् फुक्क छप्पँ जुयाः न्ह्यायेमाःगु दु ।
थथेहे महाधिवेशनया उलेज्या समारोहसं सम्बोधन यानादिसें नेकपा एमालेया मू छ्यााजे झलनाथ खनालं नेकपा एमाले संविधानसभाया स्वंगूगु तःधंगु दल जूसां नं नेकपा एमालेया जनताया न्हापांगु दल जूगु दाबी यानादीगु दु । वय्कलं च्याक्वःगु महाधिवेशन एकता सहमति व विचाःया महाधिवेशन जुइगु धयादिसें आः देशय् सहमति व सहकार्यया विकल्प मदुगु धयादीगु दु । न्हापा जूगु सहमतिया पालनाय् बह बियादिसें वय्कलं प्रमुख राजनीतिक दलतदथुइया सहकार्यपाखें जक देय्यात अग्रगमनपाखे न्ह्यःने न्ह्याकेफइगु धयादीगु दु । अथेहे उपप्रधानमन्त्री व गृहमन्त्री नापं जुयाच्वनादीम्ह एमालेया वरिष्ठ नेता वामदेव गौतमं धाःसा नेकपा एमालेया नायः पदय् सु सु ल्वाइगु धइगु विवाद दुसा व जनतां एमालेप्रति याःगु विश्वासयात हे आघात जुइगु धयादीगु दु । बन्द सत्रय् नेतातय्त कुनाः जूसां सहमति याकाः च्वःतेगु वय्कलं धयादीगु दु । महाधिवेशनय् सम्बोधन यायेगु झ्वलय् नेपाल सद्भावना पार्टीया नायः व वाणिज्य मन्त्री राजेन्द्र महतों धाःसा हिन्दीं भाषण यायेवं एमाले कार्यकर्तातय्सं विरोध याःगु खः । विरोधलिपा वय्कलं नेपाली भाषां हे सम्बोधन यानादीगु खः ।