अनमिनयात आ: हे लितछ्वये मज्यू : शान्ति मन्त्री
शान्ति मन्त्री रकम चेम्जोङं माओवादी लडाकुया व्यवस्थापन व शान्ति प्रकृया क्वःमचातल्ले नेपाः स्थित राष्ट्र संघीय मिसन अनमिनयात लितछ्वये मज्यूगु खँ धयादीगु दु । वय्कलं अनमिन छु ज्याया निंतिं वःगु खः वहे ज्या क्वःमचायेकं लितछय्वये मज्यूगु धयादिल ।
शनिवाः विराटनगर विमानस्थलय् पत्रकारत नाप खँल्हाबंला यानादिसें वय्कलं नेपालय् अनमिनया आवश्यकता अझं दनीगुलिं अनमिनया म्याद सरकारं तनीगु धयादिल । प्रधानमन्त्री लगायत मन्त्रीतय्सं अनमिनया म्याद थप मयायेगु खँ धयाच्वंगु इलय् वय्कलं अनमिनया म्याद तनेमाःगु खँ धयादीगु खः ।
वय्कलं नेपाली सेनायात अनमिनया रेखदेख पाखें मुक्त यायेगु बारे सरकारं अध्ययन यानाच्वंगु धयादिसें नेपाली सेनाय् न्हूगु सैन्य भर्ती धइगु खाली जूगु थासय् जक भर्ना चायेकूगुलिं थुकीं शान्ति सम्झौतालय् असर मलाकीगु व थ्व नियमित प्रकृया जूगु धयादिल ।
