संविधान व सरकारयात स्वमज्यू : पोखरेल
सूचना व संचना मन्त्री शंकर पोखरेलं संविधान निर्माण यायेगु ज्यायात सरकार नाप स्वाये मज्यूगु खँ धयादीगु दु ।
लोकतन्त्र दिवसया लसताय् प्रगतिशील प्राध्यापक संघं शनिवाः यलय् ग्वसाःग्वःगु ज्याझ्वलय् वय्कलं संविधानया ज्या संविधान दयेकेगु व अन दुनेया समितिं मस्यौदा तयार यायेधुंकूगु धयादिसें सरकारं उकीया निंतिं उचित वातावरण तयार यानाबीगु जक जूगु धयादिल । उकीं सरकारयात संविधान निर्माण नाप स्वानाः सरकारयात द्वपं बीमज्यूगु तर्क वय्कलं तयादिल ।
सरकारया प्रवक्त नं जुयादीम्ह पोखरेलं झिंनिगू बुँदे समझदारीया आडय् दक्वं दलत न्ह्याः वंगु खःसां अज्याःगु समझदारी पालना यायेत माओवादीं कमजोरी क्यंगु द्वपं बियादिल । माओवादीं जबर्जस्ती कब्जा यानातःगु सम्पत्ति लितमब्यूगु व वाइसिएलया अर्धसैन्य संरचना भंग मयाःगु धइगु झिंनिगू बुँदे भावनाया विपरति जूगु टिप्पणी वय्कलं यानादिल ।
अथेहे वय्कलं माओवादीं आन्दोलनया नांमय् यानाच्वंगु लिप्पांगु ज्याखँ पाखें देय्यात मुठभेडय् यंकेगु ज्या यानाच्वंगु व उकीं स्वंयम माओवादीयात घाटा जुइगु धयादिल ।
