संवैधानिक आयोगया प्रमुखत नियुक्त
सत्तारुढ गठबन्धन दल व प्रमुख प्रतिपक्षी दल दथुइ भागबण्डा मिलेमजुयाः दिनाच्वंगु थीथी संवैधानिक आयोगय् अन्ततः शुक्रवाः प्रमखुत नियुक्त जूगु दु । शुक्रवाः च्वंगु सैवैधानिक परिषद्या बैठकं अख्तियार दुरुपयोग अनुसन्धान आयोग, लोक सेवा, निर्वाचन आयोग व महालेखा परीक्षकया प्रमुखया नियुक्ति याःगु दु ।
बैठकं अख्तियारय् पुलांम्ह भूमिसुधार सचिव बाबुराम आचार्ययात नियुक्त याःगु दुसाः दुजलय् पुलांम्ह प्रहरी महानिरीक्षक हेमबहादुर गुरुङ, विश्वेश्वरमान श्रेष्ठ व दोर्णराज रेग्मीयात नियुक्त याःगु दु । अथेहे संवैधानिक परिषदं लोक सेवा आयोगय् पुलांम्ह कानून सचिव उदय नेपाली श्रेष्ठयात नियुक्त याःगु दुसाः दुजःलय् पुलांम्ह शिक्षा सचिव रामस्वरुप सिन्हाया नियुक्त याःगु दु।
निर्वाचन आयोगय् आःया आयुक्त निलकण्ठ उप्रेतीयात प्रमुख निर्वाचन आयुक्तय् नियुक्त याःगु दु । अथेहे डा. भोला शाह व भूषण श्रेष्ठयात अयोगया दुजः कथं नियुक्त याःगु दु । महालेखाय् पुलांम्ह अर्थ सचिव भानु आचार्ययात नियुक्त याःगु दु ।
