नेपाःया युरोप ब्यापारय् खुला तक लिच्वः
येँ (सन्ध्या टाइम्स)/युरोपय् ज्वालामुखी तज्यानाः पिहां वःगु कुँया कारणं अनया विमानस्थलत बन्द जुइवं नेपाःया पर्यटन व्यवसाय जक मखु आयात निर्यात व्यवसाययात नापं लिच्वः लाः वंगु खँ व्यवसायीतय्सं धाःगु दु। नेपाल चेम्बर अफ कमर्सया नायः सुरेन्द्रवीर मालाकारया कथं थौंकन्हय् जूगु विमानस्थल बन्दं यानाः युरोपपाखे जुइगु नेपाःया निर्यात ब्यापारयात म्होतिं नं खुला तक लिच्वः लाकीगु खनेदु। नेपाःया युरोप व्यापारय् थुकिं यानाः ७ निसें ८ प्रतिशत तक र्हास वइगु खँ नं वय्कलं कनादीगु दु ।
नेपालं युरोपया ३५ गू देशय् चिया, चिनी, वसः आदि थेंज्याःगु ज्वलं निर्यात यानाच्वंगु दु। थ्व सामानत इलय् हे युरोप थ्यंके मफुत धाःसा दथुइ हे स्यनाच्वनीगु खतरा दु। लिसें थ्व युरोपीय बजाःया निंतिं धकाः दयेकातःगु जूगुलिं नेपाःया बजारय् थुकियात मी नं फइ मखु ।
अथे हे युरोपपाखें कच्चा पदार्थ झिके यानाः चले यायेमाःगु नेपाःया गुलिखे उद्योगत नं थुकिं यानाः प्रभावित जुइगु खँ मालाकारं कनादीगु दु ।
उखे युरोपपाखें नेपाः वइपिं आपालं पर्यटकतय् भ्रमण धाःसा उकुन्हु हे रद्द जुइधुंकूगु दु। थुकिं यानाः ४० प्रतिशत तक युरोप ब्यापार याइगु नेपाःया पर्यटन व्यवसाय प्रभावित जुइगु खँ सम्बन्धित व्यवसायीतय्सं धाःगु दु। युरोप लिहां वने मखंपिं आपालं पर्यटकत नं नेपालय् हे थानाच्वंगु दनि ।
