कार्यकर्ता तयेगु लागिं स्कूल हडताल !
येँ (सन्ध्या टाइम्स)/शुल्क वृद्धिया विरोध धइगु नामय् अखिल क्रान्तिकारीं थौंकन्हय् निजी शिक्षण संस्थाया लेखा शाखाय् तालं ग्वयाः यानाच्वंगु हडताल वास्तवय् माओवादीं यायेत्यंगु तःधंगु आन्दोलनया लागिं येँय् वइपिं कार्यकर्तायात च्वनेगु थाय्या व्यवस्था यायेगुलिसे स्वानाच्वंगु द्वपं निजी विद्यालयतय्सं बिया हःगु दु ।
क्रान्तिकारी विद्यार्थीतय्सं छखे निजी स्कूलया लेखा शाखाय् तालं ग्वयाः मेखे वहे स्कूलया व्यवस्थापकतय्त वैशाख १८ गतेया लागिं येँय् वइपिं थः कार्यकर्तायात नयेगु व च्वनेगु थाय्या व्यवस्था याना बी माल धकाः 'इनाप' नं यानाच्वंगु खँ सीदुगु दु। क्रान्तिकारी विद्यार्थीतय्सं यदि निजी विद्यालयतय्सं काइगु अत्यधिक भर्ना शुल्क लित मबिल धाःसा वैशाख १२ गतेनिसें स्कूलया मू लुखाय् हे तालं ग्वसाः स्कूल व होस्टेल समेत बन्द याना बीगु ख्याच्वः बियाच्वंगु दु। उमिसं स्कूल बन्द यानाः अन वैशाख १८ गतेया लागिं येँय् वइपिं माओवादी कार्यकर्ता जायेकेगु योजना दयेकूगु द्वपं स्कूलतय्सं बियाहःगु खः ।
