च्याम्ह सचिवया सरुवा व पदस्थापना
सरकारं न्हूपिं व पुलांपिं यानाः च्याम्ह सचिवतय् सरुवा व पदस्थापना याःगु दु ।
शुक्रवाः च्वंगु मन्त्रिपरिषद्या बैठकं शंकर पाण्डेयात शिक्षा, दिनेश अधिकारीयात श्रम, महेन्द्र श्रेष्ठयात महिला व समाजकल्याण मन्त्रालयलय् छ्व:गु दुसा: बृन्दा हाडायात सूचना आयोग, विमल वाग्लेयात प्रधानमन्त्रीया ज्याकू, शितलबाबु रेग्मीयात शिविर व्यवस्थापन ज्याकू, माधव घिमिरेयात महालेखा नियन्त्रकया ज्याकू व आनन्दराज पोखरेलयात येँ महानगरपालिकाया जिम्मेवारी ब्यूगु दु ।
थ्वस्वयां न्ह्यः मन्त्रिपरिषदं सचिवतय् पदस्थापनाया निंतिं सिफारिस यायेत उपप्रधान मन्त्री विजयकुमार गच्छदारया नेतृत्वय् सामान्य प्रशासन मन्त्री रवीन्द्र श्रेष्ठ व संस्कृति मन्त्री मिनेन्द्र रिजाल दुथ्याःगु समिति गठन याःगु खः । उगु समितिं सचिवतय् पदस्थापना व सरुवया निंतिं सिफारिस याः कथं सरकारं निर्णय याःगु खः ।
अथेहे सरकारं माओवादीयात आन्दोलनया ज्याझ्वः व सैन्य गतिविधि दिकेत इनाप याःगु दु । शान्ति सम्झौता विरोधी गतिविधि जारी जूसाः उकीं ब्वलनीगु परिणामया जिम्मेवारी माओवादीं हे कायेमाःगु खँ नं धाःगु दु । बैठक लिपाः सरकारी प्रवक्ता संचार मन्त्री शंकर पोखरेलं सरकार सहमति, सहकार्य व मेलमिलापया पक्षय् दुगु कनादिसें माओवादीयात आन्दोलन लितकायेत इनाप यानादिल ।
सरकारं लोकतन्त्र दिवसया लसताय् २७० म्ह कैदीयात ल्यं दनीगु कैद मिनहा यायेगु निर्णय नं या:गु दु ।
