क्रान्तिकारीया बन्दया कारणं पोखराया जनजीवन प्रभावित
एनेकपा (माओवादी) सम्बद्ध विद्यार्थी संगठनं अखिल (क्रान्तिकारीं) याःगु पोखरा बन्दया कारणं शुक्रवाः अनया जनजीवन प्रभावित जूगु दु । क्रान्तिकारीया कार्यकर्ता विरुद्ध मखुगु मुद्दा तःगु व ज्वंगु धासें चरणबद्ध आन्दोलनय् कुहांवःपिं विद्यार्थीतय्सं शुक्रवाः पोखरा बन्द याःगु खः ।
बन्दया कारणं पोखराया बजाः, यातायात, शैक्षिक संस्था, कलकारखाना लगायत दक्वं ठप्प जूगु दु । बन्द सफल यायेत क्रान्तिकारी व माओवादीया कार्यकर्तात सुथंनिसें पोखराया थीथी चूकय् च्वनाः प्रदर्शन याःगु खः ।
एमाले अखिलया निम्ह कार्यकर्तायात आक्रमण याःगु धासें ज्यान कायेगु अभियोगया मुद्दा दयार यानाः पृथ्वीनारायण क्याम्पस जिल्ला समितिया अध्यक्ष दिनेश पौडेलयात प्रहरीं बिहीवाः ज्वनेवं क्रान्तिकारीं आन्दोलनया घोषणा याःगु खः । बिहीवाः हे पौडेल अदालतया आदेशया सामान्य तारीखय् रिहा जुसां मुद्दा लितमकाः तल्ले आन्दोलन मदिकेगु खँ क्रान्तिकारीं धाःगु दु ।
