नेविसंघं येँय् चक्काजाम

नेपाल विद्यार्थी संघं शुक्रवाः सुथय् येँया थीथी क्याम्पस न्ह्यनय् चक्काजाम याःगु दु । संघया नेतातय्त त्वःतेमाःगु व उमित तयातःगु मुद्दा लितकायेमाःगु माग यासें नेविसंघं शुक्रवाः घौच्छि चक्काजाम याःगु खः । चक्काजामया कारणं सुथय् गुताः इलं निसें झिताः ई तक येँया ट्राफिक अस्तव्यस्त जूगु खः ।

बिहीवाः प्रहरीं त्रिचन्द्र क्याम्पसया स्ववियु उपसभापति विष्णु पौडेल व सन्तोष न्यौपानेयात ज्वनायंकूगु खः । उमित छुं ई न्ह्यः अखिलया नेतातय्त खुकुरी पाःला आक्रमण याःगु द्वपंनय् ज्वनायंकूगु खः ।

नेविसंघं शुक्रवाः सनिलय् तकः उमित मत्वःतुसाः थप आन्दोलन यायेगु ख्याच्वः ब्यूगु दु ।