'हिंसाया सामना सरकारं याइ'
एकीकृत नेकपा (माओवादीं) शान्ति प्रकृयायात निष्कर्षय् थ्यंकेगु व संविधान च्वयेगु ज्या त्वःताः हिंसाया लँपुइ वंसाः सरकार सुम्क मच्वनीगु ख्वाच्वः सत्तारुढ दलया नेतातय्सं ब्यूगु दु । उपप्रधानमन्त्री विजयकुमार गच्छदार व एमाले नेता केपी शर्मा ओलीं माओवादीया हिंसात्कम तयारीयात सरकारं अथें स्वयाः जक मच्वनीगु ख्याच्वः ब्यूगु दु ।
बिहीवाः रिपोटर्स क्लबया न्हूपिं निर्वाचित पदाधिकारीतनाप येँय् खँल्हाबंला यानादिसें गच्छदारं माओवादीं देयन्यंक सैन्य तालिम मदिकुसाः देशय् गृहयुद्ध जुइगु धयादिल । वय्कलं माओवादींया थंज्याःगु गतिविधियात सरकारं टुलुटुलु स्वयाः च्वने मफइगु धयादिल ।
जेठ १४ गेत संविधान जारी मजुसाः देशय् तीव्र राजनीतिक ध्रुवीकरण जुइगु व बृहत प्रजातान्त्रिक मोर्चा गठन जुइगु दाबी यानादिसें उपप्रम गच्छदारं अज्याःगु बृहत् प्रजातान्त्रिक मोर्चाया सामना यायेत माओवादीयात थाकुइगु दावी यानादिल ।
वय्कलं आः तक माओवादीं थःपिंत मेमेगू दलं याकचा दयेका छखे तयेगु कुतः जूगु धकाः द्वपं बियाच्वसां आः धाःसा धाथें अथेहे जुइगु धयादिल । नापं वय्कलं अथे जुसाः माओवादी तनांवनीगु दावी नं यानादिल ।
अथेहे बुटवलय् मदन भण्डारी स्पोर्टस एकेडेमीं याःगु ज्याझ्वलय् न्ववानादिसें एमाले नेता केपी ओलीं शान्ति प्रकृया व संविधान निर्माणय् माओवादी इमान्दार मजुसाः सरकारं अज्याःगु हे व्यवहार याइगु धयादिल । वय्कलं हिंसायात निरन्तरता बियाः माओवादीं जनमतया अपमान याःगु द्वपं बियादिल ।
माओवादी सहमतिया लँपु त्वःता हानं हिंसाय् वनेगु तयारी यानाच्वसाः मेमेगु दलं सहमतिलय् वाः धकाः हालामच्वंसें हिंसाया सामना याइगु धयादिल । नापं वय्कलं सरकारं हिसांयात पनेत माओवादी नाप अज्या:गु हे व्यवहार याइगु धयादिल । वय्कलं हिंसा पाखें छुं नं समस्या समाधान मजुइगुलिं माओवादीयात हिंसा पाखे वनेत दलतय्सं कुतः यानाच्वंगु धयादिल ।
