गृहमन्त्रीयात राजीनामा यायेत नीप्यघौया अल्टिमेटम
नेपाल विद्यार्थीं संघं गृहमन्त्री भीम रावलं देशय् शान्ति सुरक्षाया व्यवस्था यायेमफुगु धासें नीप्यघौ दुने राजीनामा यायेत अल्टिमेटम ब्यूगु दु ।
बिहीवाः प्रहरीं त्रिचन्द्र क्याम्पसय् अखिलया विद्यार्थीतय्त खुकुरी पाःगु द्वपंनय् क्याम्पसया स्ववियु उपसभापति विष्णु पौडेलयात ज्वना यंकेवं प्रहरी व नेवि संघया विद्यार्थीत दथुइ जूगु ल्वापू लिपाः थःगु ज्याकूथी पत्रकार सम्मेलन यानाः उगु अल्टिमेटम ब्यूगु खः । अथेहे नेवि संघं कांग्रेस पाखें सरकारय् दुथ्याःपिं मन्त्रीतय्त नं लिहांवयेत इनाप याःगु दु ।
अथेहे बिहीवाः नेवि संघं विद्यार्थी नेतायात ज्वना यंकूगु विरोधय् थीथी क्याम्पसय् याःगु प्रदर्शनया झ्वलय् विद्यार्थीत व प्रहरी दथुइ ल्वापू जूगु दु । नेवि संघं बिनाः कारणं प्रहरीं विद्यार्थी नेतात विष्णु पौडेल व सन्तोष न्यौपाने ज्वना यंकूगु व उमित तत्काल त्वःतेमाःगु माग यासें प्रदर्शन याःगु खः ।
नेविसंघं येँया त्रिचन्द्र, पदकन्या, शंकरदेव लगायत क्याम्पसय् प्रदर्शन याःगु खः । शंकरदेवय् जूगु प्रदर्शनयात नियन्त्रणय् कायेत प्रहरीं गुंगू राउण्ड अश्रुग्यास क्येकूगु खःसा थीथी थासय् प्रहरी व विद्यार्थीत दथुइ जूगु ल्वापुइ झिंन्याम्ह नेविसंघया कार्यकर्ता घाःपाः जूगु दु ।
