इलय् हे संविधान जारी जुइगु सम्भावना समाप्त : खनाल
नेकपा (एमाले)या अध्यक्ष झलनाथ खनालं इलय् हे संविधान जारी जुइगु सम्भावना समाप्त जूगु खँ धयादीगु दु ।
बिहीवाः बिर्तामोडय् पत्रकारत नाप खँल्हाबंला यानादिसें खनालं इलय् हे संविधान जारी जुइगु सम्भावना म्हो जूगुलिं हे एमाले संविधानसभाया म्याद तनेगु निष्कर्षय् थ्यंगु कनादिल । वय्कलं याकनं हे च्वनीगु पार्टीया केन्द्रीय समिति व स्थायी समितिया बैठकं म्याद तनेगु आधिकरिक निर्णय याइगु धयादिल ।
वय्कलं माओवादी व कांग्रेसं असंवैधानकि लँपुपाखें विद्रोह यायेगु व न्हूगु जनादेशया निंतिं निर्वाचनय् वनेमाः धकाः धयाच्वंगु धापूत असान्दर्भिक जूगु धयादिसें संविधानय् अपरिवर्तनीय खँय् सहमति कथं संशोधन यानाः निकासय् थ्यंकेमाःगु धयादिल । जनआन्दोलन-२या उपलब्धी, लोकतन्त्र थंज्याःगु अपरिवर्तनीय खँ बाहेक मेगू खँय् संशोधन जुइफइगु धयादिल ।
अथेहे अध्यक्ष खनालं प्रमुख दलत दथुइ गतिरोध खनेदुसां उमित मिले जुइत बाघौ नं म्वाःगु दावी यानादिल । वय्कलं स्वंगू प्रमुख दल मिले जुइगुया विकल्प मदुगु धयादिल ।
