पुलांपिं सुरक्षाकर्मीतय्सं ट्रक च्याकल

द्वन्द्वया इलय् जागिर त्वःतुपिं सेना व प्रहरीतय्सं थःपिन्त पुर्नवहाली यायेमाःगु माग सुनुवाई मजूगु धासें बिहीवाः याःगु पश्मिञ्चल बन्दया झ्वलय् छगः मालवाहक ट्रक च्याकूगु दु । बिहीवाः सुथय् न्याताः इलय् बारां पोखराय् सिमेन्ट ज्वना वनाच्वंगु ना. ४. ख. २६२७ नम्बरया ट्रकयात पृथ्वी राजमार्गया घाँसीकुवालय् च्याकाब्यूगु खः ।

राजमार्गय् सुथंनिसें हे प्रदर्शन यानाच्वंपिं नीम्ह प्रदर्शनकारीतय्सं ट्रकय् मि तयाः ब्यूगुलिं अन दक्वं सवारी साधन ठप्प जूगु दु । प्रदर्शनकारीतय्सं पर्यटकतय् बस तकं चाले याये ब्यूगु मदु । सुथय् प्रदर्शनकारीतय्सं बन्दया झ्वलय् सवारी साधन चले याःगु धासें खुगलं मल्याक सवारी साधनय् तोडफोड याःगु दु ।