सचिवतय् पदस्थापनाया निंतिं समितियात अख्तियारी
सरकारं सचिवतय् पदस्थापनाया निंतिं उपप्रधानमन्त्री विजयकुमार गच्छदारया संयोजकत्वय् स्वम्ह दुजः दुगु समितियात अख्तियारी ब्यूगु दु । उगु समितिलय् सामान्य प्रशासन मन्त्री रवीन्द्र श्रेष्ठ व संस्कृति मन्त्री मिनेन्द्र रिजाल दुजः कथं दी । सरकारं निलाः न्ह्यः हे बढुवा याःपिं न्याम्ह सचिवतय् पदस्थापना अझं जुमफुनी ।
बुधवाः च्वंगु मन्त्रीपरिषदया बैठकं झिंखुक्वःगु सार्क शिखर सम्मेलनय् प्रधानमन्त्री माधवकुमार नेपालया नेतृत्वय् नीप्यम्ह दुजः दुगु प्रतिनिधिमण्डलं ब्वति कायेगु निर्णय याःगु दु । वैशाषा १५ व १६ गते भुटानय् जुइगु सम्मेलनय् ब्वति कायेत प्रधानमन्त्री नेपाल नापं वय्कया जहान गायत्री नेपाल, उपप्रधान नापं परराष्ट्रमन्त्री सुजाता कोइराला, परराष्ट्रसचिव मदन भट्टराई, प्रधानमन्त्रीया परराष्ट्र सल्लाहकार राजन भट्टराई लगायतया नां क्वःछिउगु दु ।
अथेहे बैठकं दक्षिणकाली कुलेखानी सतक सुधारया निंतिं भारत सरकार नाप अनुदान ग्वाहालि कायेत अर्थ मन्त्रालययात स्वीकृति ब्यूगु दु ।
सरकारया प्रवक्ता नापं सूचना व संचार मन्त्री शंकर पोखरेलं बैठकय् माओवादीं देय्न्यंकया थीथी थासय् न्ह्याकूगु तालिम लगायतया गतिविधिया बारे समीक्षा जूगु कनादिसें थुकीयात सरकारं गम्भीर रुपं काःगु कनादिल ।
