संयन्त्रया मेगू बैठकं प्रमुख विषलय् निर्णय याइगु
ताः ई लिपाः स्वंगू प्रमुख दलत दुथ्याःगु उच्चस्तरीय राजनीतिक संयन्त्रया बुधवाः च्वंगु बैठक बिना निष्कर्ष क्वचाःगु दु । संचवाः लोकतन्त्र दिवस कुन्हु च्वनीगु संयन्त्रया बैठकं विवादित विषयया बारे निर्णय याइगु जूगु दु ।
सिंहदरवारय् दुगु माओवादी संसदीय दलया ज्याकूथीइ बुधवाः जूगु संयन्त्रया बैठकं राज्य पुनर्संरचना आयोग गठन, वाइसिएलया अर्धसैनिक संरचना विघटन, छेँबुँ लितबीगु, संविधान निर्माण, शान्ति प्रकृया नापं राष्ट्रिय सरकर गठनया बारे मेगू बैठकय् निर्णय यायेगु खँ क्वःछिउगु दु । बैठकय् उपस्थित माओवादी उपाध्यक्ष नारायाणकाजी श्रेष्ठ 'प्रकाशं' थौंया बैठकय् थुकीया बारे समान्य सहलह जक जूगु व संचवाःया बैठकं थुकी निर्णय प्याकेजय् याइगु कनादिल ।
थौंया बैठकय् कांग्रेस व एमालेया नेतातयसं संविधानसभाया ई तनेगु बारे प्रस्ताव याइगु धाःसां उकीया बारे बैठकय् छुं नं सहलह मजू । मेगू बैठकय् संयन्त्रया आमन्त्रित दुजः प्रधानमन्त्री माधवकुमार नेपालयात नं ब्वति याकीगु खँ धाःगु दु ।
बैठकय् माओवादी अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टरई व नारायणकाजी श्रेष्ठ 'प्रकाश', कांग्रेस पाखें कार्यवहाक सभापति सुशील कोइराला, वरिष्ठ नेता शेरबहादुर देउवा व संसदीय दलया नेता रामचन्द्र पौडेलया ब्वति दुगु खःसा एमाले पाखें अध्यक्ष झलनाथ खनाल, सचिव विष्णु पौडेल व स्थायी समिति दुजः भरतमोहन अधिकारीया ब्वति दुगु खः ।
