१५ गते सैन्य भर्ना प्रकरणय् सहलह
नेपाली सेनां न्हूगु पदपूर्तिया निंतिं आह्वान यानाः अदालतया अपहेलना या:गु धासें दयार जूगु रिटय् सर्वोच्च अदालतं निगूलिं पक्षयात वैशाष १५ गते बुधवाः सहलहया निंतिं सःतुगु दु ।
न्यायाधीश तपबहादुर मगरया इजलासं बुधवाः प्रारम्भिक सुनुवाइ यानादिसें अन्तरिम आदेशया निंतिं विपक्षीया समेत बिचाः न्यनेमाःगुलिं वैशाष १५ गते निगूलिं पक्षयात सलहलया निंतिं सतेगु निर्णय याःगु खः । आदेशय् शान्ति सम्झौता कथं निगूलिं पक्षयात सहलह निंतिं सतेगु उपयुक्त जूगु खँ न्ह्यथंनातःगु दु ।
अधिवक्ता श्रीकृष्णा सुवेदी लगायत न्हय्म्ह कानुन व्यवसायीतय्सं सेनां पदपूर्ति यायेत आह्वान यानाः सर्वोच्च अदालतया अपेहलना जूगु धासें सोमवाः सर्वोच्चय् रिट दायर याःगु खः । उगु रिटय् प्रधानमन्त्री व मन्त्रिपरिषदया ज्याकू, रक्षामनत्री, प्रधानसेनापति, सेनाया जंगी अड्डा व कार्यरथी विभागयात विपक्षी दयेकातःगु दु ।
नेपाली सेनां सोमवाः प्राविधिक पदय् २७१ म्हेसिया निंतिं भर्नाया आह्वान याःगु खः ।
