थौं असनंनिसें प्रचार यात्रा

वैशाख १४ गते संविधानसभा घेराउ

येँ (सन्ध्या टाइम्स)/बैशाख १४ गते संविधानसभा घेराउ ज्याझ्वः ताःलाकेत थौं सुथय् येँया असनं छगू प्रचार यात्रा पिकाल। आन्दोलनया निंतिं समन्वय यायेत नीस्वंगु येँ महानगरपालिका वडा नं. २७, २८ व ३० वडाया संयोजन समितिया ग्वसालय् जूगु उगु प्रचार यात्रा स्वंगुलिं वडा चाःहिलाः हाकनं असनय् तुं थ्यंकाः क्वचायेकूगु खः। यात्राय् नेपालभाषा ख्यःया कार्यकर्ता नापं थीथी राजनीतिक पार्टीया नेवाः कार्यकर्तातय्सं ब्वति कयादीगु खः ।

अथे हे नेवाः स्वायत्त राज्य मंकाः संघर्ष समितिं म्हिगः नेवाः न्हय्लुवात लगायत राजनीतिक पार्टीया नेवाः कार्यकर्ताया दथुइ छगू भेला यात। उगु भेलाय् मंकाः संघर्ष समितिया नायः सुजिव बज्राचार्यं नेवाः स्वायत्त राज्यया निंतिं न्ह्यानाच्वंगु आःया आन्दोलनया विकास नेपालभाषाया आन्दोलनं हे जूगुलिं नेपालभाषाया पुलांपिं नापं न्हूपिं कार्यकर्तात आन्दोलनय् सक्रिय रुपं ब्वति कायेत इनाप यानादीगु खः। भेलाय् सभासद तिर्थराम डंगोलं नेवाःतय्सं नेवाः राज्यया निंतिं तःधंगु संकल्प यानाः न्ह्याः वनेमाःगु अवस्था दुगु खँय् बः बियादीगु खःसा मेम्ह सभासद बुद्ध साय्मिं संघीयता विरोधीतय्त म्हुतुप्वाः तिकाः न्ह्याः वनेमाः धयादिल। अथे हे भाषिक कार्यकर्ता हितकरविरसिंह कंसकारं १४ गतेया संविधानसभा घेराउ ज्याझ्वः ताःलाकेत मानव अधिकारवादी व नागरिक समाजया मनूतय्त नं सःतेमाः धयादिल। ज्याझ्वलय् डा. पुष्पराज राजकर्णिकार, डा. चुन्दा वज्राचार्य, विरेन्द्रभक्त श्रेष्ठ, नरेशवीर शाक्य, पवित्र वज्राचार्य, अमृतमान मानन्धरपिंसं नं न्ववानादीगु खः ।

थ्वहे दथुइ नेवाः स्वायत्त राज्य मंकाः संघर्ष समितिया थौं मुँज्या च्वनाः बैशाख १४ गतेया संविधानसभा घेराउ ज्याझ्वःया नितिं व्यवस्थापन पक्षयात कयाः सहलह ब्याकीगु जूगु दु ।