हत्याया विरोधय् नवलपरासी बन्द
येँ (सन्ध्या टाइम्स)/एकिकृत नेकपा (माओवादी) या मजदूर कार्यकर्ता स्याना बिउगु विरोधय् अपराधीयात कारवाही यायेमाःगु माग यासें माओवादीया अखिल नेपाल ट्रेड युनियन महासंघं थनिंनिसें नवलपरासी अनिश्चितकाल तकया निंतिं बन्द याःगु दु ।
मजदूरतय् बन्दं यानाः थौं सुथंनिसें हे नवलपरासीया फुक्क उद्योग, कलकारखाना, पसः व यातायात बन्द जुयाच्वंगु दु।
नेकपा (एमाले) या कार्यकर्तातय् आक्रमणय् लानाः मुकुन्दर लागाया गोर्खा बुअरीइ ज्या याइम्ह थः कार्यकर्ता बुद्धिराम महतो सीगु खँ माओवादीं धाःगु दु। कारखानाय् मजदूर नियुक्तिया विषययात कयाः विवाद जूगु इलय् एमालेया मजदूरतय्सं आक्रमण यानाः थःपिनि झिंन्याम्ह मजदूर कार्यकर्ता घाःपाः याना बिउगु द्वपं माओवादीं बिउगु दु। घाःपाः जूपिं मजदूरतय्त भरतपुर अस्पतालय् वासः याका तःगु दु।
थ्वहे दथुइ नेकपा (एमाले) या नवलपरासीं उगु घटनाय् थःपिनि संलग्नता मदु धकाः वक्तव्य बिउगु दु ।
नवलपरासीया जिल्ला सचिव तिलक महतं घटनायात कयाः म्वाःमदुगु कथं बय्बय् यानाः ल्वापु तच्वयेकाः थःपिंत द्वपं बिउगु खः धासें उगु घटनायात कयाः छानविन यायेत नं सम्बन्धित पक्षयात माग यानादीगु दु ।
