छेँ-बुँया कारोबार गाक्कं कुहां वल
येँ (सन्ध्या टाइम्स)/नेपाल राष्ट्र बैंकं छेँ-बुँ थेंजाःगु उनुत्पादक क्षेत्रय् अप्वः लगानी जुया वयाच्वंगु धासें छेँ-बुँ न्याये-मी यायेगुलिइ कडा नीति लागू यायेवं आः वयाः थुकिया कारोबार न्हय्न्यागू प्रतिशतं मल्याक कुहां वःगु खँ सीदुगु दु ।
राष्ट्र बैंकं छेँ-बुँ अप्वः लगानी जुयाच्वंगु धासें थुकिया निंतिं त्यासा बीगु बन्द यायेगु नापं सरकारं हःगु परिवर्तित मूल्यांकन प्रणाली व न्याये-मी यायेबलय् पूँजीगत लाभकर लगायतया नीति नियमया कारणं थुकिया कारोबार हे छगू कथं ठप्प जुइगुपाखे वनाच्वंगु थुकिया व्यवसायीतय्सं धाःगु दु ।
थुगु आर्थिक दँया वंगु गुलाया दुने थगुने स्वयां म्हो जक राजस्व दुहां वःगु व सरकारं नं छेँ-बुँया मुल्यांकनय् नीन्यागू प्रतिशत भाः थकाःगुलिं जक छुँ भचा अप्वः राजस्व म्हय् फुगु भूमि सुधार तथा व्यवस्थापन विभागं न्ह्यथंगु दु।
वंगु दँय् जक सरकारं छेँ-बुँया कारोबारपाखें न्हय्गू अर्ब प्यंगू करोड तका राजस्व संकलन याःगु खः। थगुनेया तुलनाय् थुगुसीया कारोबारं अप्वलय् नीन्यागू प्रतिशत जक दां उठे जुइगु अनुमान न्हापा हे याःगु खः ।
विभागया कथं नगुने स्वयां थगुने लय् पतिकं शतप्रतिशत धइथें राजस्व संकलन जुया वयाच्वंगु खःसा थुगु दँय् लय् पतिकं हे करोडौं तका दां म्हो जक स.कलन जुयाच्वंगु दु।
उखे स्वनिगःया मालपोत कार्यालय अन्तर्गत वंगु चैत्र तकया दुने डिल्लीबजारं खुगू करोड, चाबहिलं प्यंगू करोड न्यय्न्यागू लाख, ख्वपया मालपोत कार्यालयं निगू करोड, यलं निगू करोड न्हय्प्यंगू लाख तक राजस्व संकलन जूगु खँ धाःगु दु ।
