अमेरिकी राजदुत राजनीतिक भेटघाटय् व्यस्त
नेपाःया निंतिं न्हूम्ह अमेरिकी राजदुत स्कट एच डिलिसी थःगु राजनीतिक भेटघाटय् व्यस्त जुयादीगु दु । वय्कलं बुधवाः माओवादी अध्यक्ष पुष्पकमल दाहाल 'प्रचण्ड', कांग्रेस संसदीय दलया नेता रामचन्द्र पौडेल व एमाले अध्यक्ष झलनाथ खनालयात नापलानाः खँल्हाबंला यानादीगु दु ।
माओवादी अध्यक्ष प्रचण्ड नापया खँल्हाबंलाय् राजदुत डिलिसीं जारी शान्ति प्रकृया, संविधान च्वयेगु ज्याया प्रगति नापं माओवादी लडाकु समायोजनया बारे च्यूताः प्वंकादीगु खः । नापं वय्कलं न्हूगु संविधान निर्माण व शान्ति प्रकृयायात निष्कर्षय् थ्यंकेत प्रमखु दलत दथुइ सहकार्य व सहमतिया विकल्प मदुलिं राष्ट्रिय सहमति यानाः न्ह्याः वनेत सुझाव बियादीगु खः ।
उगु इलय् माओवादी अध्यक्ष प्रचण्डं नेपाःया शान्ति प्रकृया व प्रजातन्त्रय् अमेरिकां यानावयाच्वंगु ग्वाहालिया निंतिं सुभाय् बियादिसें राष्ट्रिय सहमतिया हे माध्यमं वनेत माओवादी प्रतिबद्ध दुगु धयादिल ।
अथेहे कांग्रेस संसदीय दलया नेता रामचन्द्र पौडेल व एमाले अध्यक्ष झलनाथ खनाल नापया खँल्हाबंलाय् नं राजदुत डिलिसीं शान्ति प्रकृया व संविधान निर्माणया प्रगति नापं लिप्पांगु राजनीतिक घटनाक्रम व माओवादी नापया स्वापूया बारे च्यूताः प्वंकादीगु ख: ।
