हत्यारायात कारवाही मयासाः आन्दोलन यायेगु ख्याच्वः
एकीकृत नेकपा (माओवादी)या मजदुर संगठन अखिल नेपाल ट्रेड युनियन महासंघं एमालेया कार्यकर्तातय्सं दायाः सीम्ह वुद्धिराम महतोया हत्यारायात कारवाही मयासाः देय्न्यंक आन्दोलन यायेगु ख्याच्वः ब्यूगु दु ।
महासंघया अध्यक्ष शालिकराम जम्कट्टेलं बुधवाः छगू विज्ञप्ति पिथनादिसें महतोया हत्याय् एमालेया देवकला बराल, देवीदत्त कंडेल, मान बहादुर गुरुङ व यमनाथ आचार्य संलग्न जूगु द्वपं ब्यादिसें उमित कारवाही यायेमाःगु माग याःगु दु । विज्ञप्तिइ सत्ताया आडय् थःपिनि कार्यकर्तायात आक्रमण यायेगु ज्या अप्वःगु धयादिसें शान्ति प्रकृयया स्यंकेगु कुत: जुयाच्वंगु द्वपं नं ब्यूगु दु ।
अथेहे विज्ञप्तिइ सीम्ह महतोयात शहीद घोषणा यायेमाःगु, वया छेँजःयात उचित क्षतिपूर्ति बीमाःगु, आश्रित छेँजःयात जागिर बीमाःगु लगायत माग यानातःगु दु ।
मंगलवाः नवलपरासीलय् एमाले व माओवादी कार्यकर्ता दथुइ जूगु ल्वापुइ गैंडाको ४ निवासी पीदँया माओवादी कार्यकर्ता महतो सीगु खः । ल्वापुइ लानाः घाःपाः जुम्ह महतोयात येँया न्युरो अस्पतालय् वासः याकातःगु इलय् मदुगु खः ।
नवलपरासीया मुकुन्दपुरय् दुगु गोर्खा व्रुअरी उद्योगय् कर्मचारी नियुक्तिया विषयलय् निगू पुचः दथुइ ल्वापु जूगु मंगलवा: ख: । ल्वापुइ लानाः माओवादी समर्थित निम्ह मजदुर, निम्ह एमाले समर्थित व छम्ह स्थानीयवासी नं घाःपाः जूगु दु ।
