'माओवादी सहमतीय सरकारया पक्षय्'
एकीकृत नेकपा (माओवादी)या सचिव सीपी गजुरोलं माओवादी सहमतीय सरकारया पक्षय् दुगु खँ धयादीगु दु । वय्कलं बहुमतीय आधारया पलेसाः सहमतीय आधारय् सरकार गठन जुसाः अज्याःगु सरकारय् थःपिंसं नं ब्वति कायेगु धयादिल ।
क्रान्तिकारी पत्रकार संघ सुनसरीं बुधवाः इटहरीलय् ग्वसाःग्वःगु पत्रकार सम्मेलनय् वय्कलं माओवादी बहुमत वा अल्पमतया पक्षय् मदुगु स्पष्ट यानादिसें सहमतिया आधारय् सरकर गठन जुसाः माओवादीं उकी ब्वति कायेफइगु धयादिल ।
वय्कलं माधवकुमार नेपालया नेतृत्वय् संविधान निर्माण जुइमफइगु दाबी यानादिसें इलय् हे संविधान निर्माण मजुसाः सतकं हे संविधान घोषणा यायेगु ख्याच्वः बियादिल । सरकारं विस्तृत शान्ति सम्झौता विपरीत नेपाली सेनाय् भर्ना चायेकाः शान्ति सम्झौताया उल्लंघन याःगु द्वपं वय्कलं बियादिल ।
सत्तारुढ दलतय्सं माओवादीयात याकचा दयेकाः हानं जंगल छ्वयेगु कुतः यानाच्वंगु द्वपं बियादिसें वय्कलं आः माओवादी जंगल लिहांमवंसें शान्तिपूर्ण आन्दोलन मार्फत न्ह्याः वनीगु धयादिल । अथेहे वय्कलं सत्तारुढ दलतय्सं माओवादीं सैन्य दस्ता तयार यानाः सत्ता कब्जा यायेत स्वयच्वंगु धकाः ब्यूगु द्वपं हल्ला जक जूगु दाबी यानादिल । वय्कलं संगठनविस्तारया झ्वलय् जुयाच्वंगु गतिविधियात सैन्य दस्ता धायेमफइगु धयादिल ।
