थौं नेवाः न्ह्यलुवाःतलिसे सहलह
वैशाख १४ गते संविधानसभा घेराउ
येँ (सन्ध्या टाइम्स)/बैशाख १४ गते संविधानसभा घेराउ ज्याझ्वः ताःलाकेत थौं नेवाः स्वायत्त राज्य मंकाः संघर्ष समितिं नेवाः न्हय्लुवात लगायत राजनीतिक पार्टीया नेवाः कार्यकर्तातय् भेला यायेत्यंगु दु। अथे हे नेवाः स्वायत्त राज्य मंकाः परिषद किपूपाखें थौं हे च्वबाहाःया ल्याय्म्हतय्गु भेला यायेत्यंगु दु। परिषदं कन्हय् क्वरय् नं ल्याय्म्ह भेला व कंस किपू लागाया नेवाः कलाकारभेला यायेगु ज्याझ्वः दयेकातःगु दु। संविधानसभा घेराउ यायेत नेवाः राष्ट्रिय मुक्ति मोर्चां स्वनिगलं पिनेया नेवाः कार्यकर्तातय्त नं येँय् हइगु जूग दु ।
कलाकारतय्गु नं पुचः
येँ (सन्ध्या टाइम्स)/क्वःछिनातःगु इलय् हे न्हूगु संविधान जारी यायेमाःगु नापं नेवाः स्वायत्त राज्य सुनिश्चित यायेमाःगु माग यासें नेवाः स्वायत्त राज्य मंकाः संघर्ष समितिं घोषणा यानातःगु संघर्षया ज्याझ्वः कथं संविधानसभा घेराउ ताःलाकेत नेवाः कलाकारत नं सतकय् क्वत हयेगु नापं थाय् थासय् सांस्कृतिक अभियान नं न्ह्याकेगु निंतिं कलाकार वदन शर्माया नेतृत्वय् कलाकारतय्गु पुचः नीस्वंगु दु ।
मंकाः संघर्ष समितिं म्हिगः याःगु नेवाः कलाकारतय्गु भेलां नीस्वंगु उगु कलाकार पुचलय् दुजः कथं दिपा महर्जन, ज्ञानबहादुर महर्जन, सुरेन्द्र तुलाधर, इश्वर जोशी, राजभाई जकःमि व वीरप्रसाद भंसारीपिं च्वनादीगु दु ।
नेवाः जनसांस्कृतिक मंकाः गुथि व इसास किपूपाखें नं १४ गतेया ज्याझ्वः ताःलाकेत थाय्थासय् सांस्कृतिक अभियान न्ह्याकाच्वंगु दु ।
