द्यनाच्वंपिं निम्ह गार्ड सिनाच्वन
येँ (सन्ध्या टाइम्स)/प्राइम कमर्सियल बैंकया असं शाखाय् पाः च्वनीपिं निम्ह सुरक्षा गार्ड सिनाच्वंगु अवस्थाय् लूगु दु। चान्हय् पाः च्वनीपिं निम्ह गार्ड मध्ये टिकाबहादुर खड्का (४९ दँ) द्यनाच्वंथाय् हे सिनाच्वंगु खःसा बमबहादुर गुरुङ्ग वीर अस्पतालय् वासः याकुयाकुं मदुगु खः। ४० दँ दुम्ह गुरुङ्गयात बेहोश जुयाच्वंगु अवस्थाय् अस्पताल यंकूगु खः।
उपिं सीगुया कारण सी मदुनि। थौं सुथय् तिनि मदुम्ह गुरुङ्गं अस्पतालय् म्हिगः बहनी जा नये सिधयेकाः थःपिं अय्लाः भचा त्वनाः द्यं वनागु धकाः कंगु खँ सीदुगु दु ।
उपिं कार्यरत लाहुरे सेक्युरिटी प्रा.लि.या सञ्चालक ध्रुवजीं धाःसा उमिसं अय्लाः त्वंगु धइगु नं सी मदुनि, बैंकय् लुटपाट जूगु नं खने मदु, अय् जूगुलिं मृत्युया कारण सीकेत पोष्टमार्टमया रिपोर्ट हे वयेके मालीगु खँ 'सन्ध्या टाइम्स'यात कनादिल ।
थौं सुथय् ड्युटी चेन्ज याः वःपिं सेक्युरिटीया मेपिं गार्डतय्सं उपिं छम्ह सिनाच्वंगु व छम्ह बेहोश जुयाच्वंगु अवस्थाय् लुइकूगु खः ।
वंगु लछि ति न्ह्यः तिनि चायेकूगु प्राइम बैंकया उगु शाखा मुक्कं मिसापिंसं जक सञ्चालन याइगु खः ।
