'१४ गते कुहां मवःम्ह नेवाः मखु'
येँ (सन्ध्या टाइम्स)/थ्वहे वइगु वैशाख १४ गते जुइगु संविधानसभा घेराउ ज्याझ्वलय् कलाकार, डाक्टर, वकिल, व्यापारी, इन्जिनीयर आदि थेंज्याःगु पेशाकर्मी नेवाःत कुहां मवल धाःसा उपिं नेवाः हे मखु। उमिके नेवाः नुगः हे मदु धकाः झीसं तायेके माली। नेवाः स्वायत्त राज्य मंकाः संघर्ष समितिया वर्तमान नायः सुजिव वज्राचार्यं थ्व खँ धयादीगु खः ।
वय्कलं वैशाख १४ गते जुइगु घेराउ ज्याझ्वलय् सकलें नेवाःतय्सं सशक्त रुपं ब्वति कायेत नं इनाप यानादिल।
नेवाः जागरण मञ्चपाखें नियमित रुपं याना वयाच्वंगु चियापान ज्याझ्वलय् न्ववासें वय्कलं थ्व बिचाः प्वंकादीगु खः। उगु ज्याझ्वलय् स्वनिगःया पुलांगु वस्ती तोखाया श्री भगवती क्लबयात हनेगु ज्या नं जूगु खः ।
श्री भगवती क्लबं नेवाः संकिपा 'याकःम्ह्याय्' या च्यारिटी शो ताःलाकेत ग्वाहालि याःगु खः। उगु क्लबया थ्व ग्वाहालिपाखें मेमेगु क्लबतय्त नं नेवाः संकिपायात थीथी थासय् विस्तार याना यंकेत प्रेरणा बीगु तायेकाः क्लबयात उकथं हनागु खँ नेवाः जागरण संकिपा मञ्चया नायः विजयरत्न असंबरें कनादिल ।
हनापौ लःल्हाना कासें क्लबया नायः दिपक जोशीं 'याकः म्ह्याय्' छगू जक मेमेगु नेवाः संकिपा नं थुकथं हे सकलें मुनाः स्वः वनेगु प्रतिवद्धता प्वंकादिल ।
ज्याझ्वलय् मञ्चया छ्यांज्ये नापं 'याकःम्ह्याय्' संकिपाया च्वमि, कलाकार लिसें सहनिर्देशक सुरेन्द्र तुलाधरं तोखाया सकलें नेवाःतय्सं नेवाः संकिपा व नेवाः कलाकारतय् निंतिं न्ह्याबलें छपलाः न्ह्यचिलाः ग्वाहालि याना वयाच्वंगु खँ कनादिल ।
