जातिय, भाषिक व लैंगिक अधिकार सुनिश्चित जुइ : खनाल
नेकपा (एमाले)या अध्यक्ष झलनाथ खनालं न्हूगु संविधानय् आदिवासी जनजातिया माग सम्वोधन जुइगु खँ धयादीगु दु । वय्कलं जातिय, भाषिक व लैंगिक अधिकारया सुनिश्चिता जुइ कथं न्हूगु संविधान जारी जुइगु धयादिल ।
मंगलवाः येँय् नेपाल आदिवासी जनजाति महासंघं ग्वसाःग्वःगु तुच्चा ज्याझ्वलय् वय्कलं जेठ १४ गते हे संविधान जारी यायेमफइगुलिं राजनीतिक सहमतिया आधारय् संविधानसभाया कार्यकाल तनेमाःगु धयादिल । वय्कलं बुधवाः च्वनीगु उच्चस्तरीय राजनीतिक संयन्त्रया बैठकय् संविधानसभाया कार्यकाल तनेगु प्रस्ताव एमालें यंकीगु नं धयादिल ।
वय्कलं संविधान निर्माणया वातावरण दयेकेत दलत दथुइ सहमतीय राजनीतिलय् वनेगुया विकल्प मदुगु धयादिसें राजनीतिक मुठभेड ब्वलंकेमबीत नं राजनीतिक सहमतिलय् वनेमाःगु धयादिल । अथेहे वय्कलं वर्तमान सरकार परिवर्तन यायेगु आःया प्राथमिकता मजूगु धयादिसें संविधान मच्वयेकं थःपिं जनताया दथुइ मवनीगु धयादिल ।
