दलत युद्ध पाखे वनेत स्वयाच्वंगु प्रचण्डया द्वपं
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राजनीतिक दलत संविधान निर्माण यायेगु ज्याः त्वःताः देय्यात युद्धय् छ्वयेत स्वयाच्वंगु द्वपं बियादीगु दु । वय्कलं देय्यात लुटे यायेत च्वनाच्वंपिंसं माओवादीयात जंगल छ्वयेत स्वयाच्वंसां थःपिं येँ नं मत्वःतीगु धयादिल ।
न्हूगु संविधानय् ख्रिश्चियन सुझाव केन्द्रीय समितिं खुल्लामञ्चय् मंगलवा: याःगु ज्याझ्वलय् न्ववानादिसें प्रचण्डं धर्म निरपेक्षता, गणतन्त्र व संघीयतां देय् ल्यूने वनेमफइगु धयादिल । वय्कलं माओवादीं धर्म निरपेक्षता, गणतन्त्र व संघीयतायात संस्थागत यायेत आन्दोलन यानाच्वंगु दावी नं यानादिसें दक्वं धर्मयात समान व्यवहार यायेमफुसाः देय् अराजकता ब्वलनीगु धयादिल ।
वर्तमान सरकार विघटन मजुइकं जेठ १४य् संविधान जारी जुइमफइगु धयादिसें प्रचण्डं राष्ट्रिय सहमतिया सरकार गठन यायेफुसाः जक संविधान जारी यायेफइगु धयादिल । दक्वं दलतय्सं थःथःगु कमी कमजोरी स्वीकार यानाः गल्ती भिंकूसाः इलय् हे संविधान जारी यायेफइगु खँ नं वय्कलं धयादिल ।
ख्रिश्चियन सुझाव केन्द्रीय समितिं न्हूगु संविधानय् धर्म निरपेक्षता व धार्मिक अधिकार जुइमाःगु माग याःगु दु । नापं संवैधानिक धार्मिक आयोग व धार्मिक हक सम्बन्धी ऐन समेत दयेमाःगु माग याःगु दु ।
