शुल्क बृद्धिया विरोधय् थौं नं तालाबन्दी
एकीकृत नेकपा (माओवादी) सम्बद्ध विद्यार्थी संगठन अनेरास्ववियु (क्रान्तिकारीं) निजी विद्यालयं शुल्क बृद्धि याःगु विरोधय् सोमवाः निसें याःगु तालाबन्दीयात थौं नं निरन्तरता ब्यूगु दु । क्रान्तिकारी विद्यार्थीतय्सं देय्न्यंकया निजी विद्यालयया लेखा शाखाय् मंगलवाः नं तालाबन्दी याःगु दु ।
निजी विद्यालयं मासिक शुल्कय् नीन्यागु प्रतिशत बृद्धि या:गु व ऐन विपरित शुल्क काःगु धासें क्रान्तिकारी आन्दोलन सुरु याःगु खः । उमिसं शुल्क बृद्धि यायेगु निजी विद्यालयया निर्णय लितमकातल्ले तालाबन्दी जारी कायम जुइगु खँ धाःगु दु ।
अथेहे उमिसं बैशाष १२ गते तक थःपिनिगु माग पूमवंसाः देय्न्यंक शैक्षिक हड्ताल यायेगु ख्याच्वः नं ब्यूगु दु । उखे निजी व आवासीय विद्यालय अर्गनाइजेसन (प्याब्सनं) धाःसा शुल्क बृद्धि बाध्यात्मक जूगु धासें शुल्क बृद्धिया विकल्क मदुगुलिं विरोधया औचित्य मदुगु खँ धाःगु दु ।
