लोकतान्त्रिक पद्धति स्वीकार याःसा सहमति जुइ : प्रम
प्रधानमन्त्री माधवकुमार नेपालं दलत दथुइ सहमति व सहकार्यया विकल्प मदुगु खँ धयादीगु दु । वय्कलं लोकतान्त्रिक मूल्य, मान्यता व पद्धतियात दक्वसिनं स्वीकार यायेमाःगु खँय् बः बियादिल । अलोकतान्त्रिक लँपू पाखें याइगु ज्या थःत स्वीकार्य मजुइगु धयादिसें प्रधानमन्त्री नेपालं लोकतान्त्रिक पद्धति स्वीकार यानाः वसाः राजनीकित सहमति यायेत अपुइगु धयादिल ।
मंगलवाः कार्टर सेन्टरया परामर्शदाता पिटर वार्लीनाप प्रधानमन्त्री निवास बालुवाटारय् खँल्हाबंला यानादिसें प्रधानमन्त्री नेपालं शान्ति प्रकृयायात सार्थक निष्कर्षय् थ्यंकेत थः तसकं लचकताया साथ प्रस्तुत जुयागु धयादिसें उकीया निंतिं माओवादी लडाकुया समायोजन व पुनःस्थापना जुइमाःगु धयादिल । प्रधानमन्त्री नेपालं गणतन्त्रया संस्थागत यायेत व जनताया परिवर्तनया चाहनायात मूर्त रुप बीत दक्वसिनं थःथःगु हठ त्याग यायेमाःगु खँय् ब: बियादिल ।
उगु इलय् सेन्टरया परामर्शदाता वर्लीं नेपाःया शान्ति प्रकृया व संविधान च्वयेगु ज्याया प्रगतिया बारे च्यूताः प्वंकादीगु खः । वय्कं सेन्टर नेपाःया शान्ति प्रकृयाया निंतिं आवश्यक ग्वाहालि यायेत तयार दुगु नं धयादिल ।
