'स्वद्वं निसें न्याद्वं लाडकु समायोजन यायेगु सहमित'
नेपाली कांग्रेसया केन्द्रीय दुजः शेखर कोइरालां प्रधानमन्त्री माधवकुमार नेपालं तःगु न्यागू सर्त पुवंकूसाः माओवादीया नेतृत्वतय् सरकार गठन जुइफुगु खँ धयादीगु दु ।
नेपाल प्रेस युनियन मोरङंय् मंगलवाः विरोटनगरय् ग्वसाःग्वःगु पत्रकार सम्मेलनय् वय्कलं प्रधानमन्त्री नेपालं तःगु सर्त कथं लडाकु समायोजन, वाईसिइलया अर्ध सैनिक संरचना विघटन, कब्जा यानातःगु छेँबुँ लितःबीगु, शान्ति प्रकृयाय् गम्भीर जुइगु व जिम्मेवार राजनीतिक दल जुसाः माओवादीया नेतृत्वय् सरकार गठन जुइगु लँपू चालीगु धयादिल ।
माओवादी नेतृत्वया सरकार गठन जुइत राजनीतिक सहमति यायेमाःगु व जनताया विश्वास त्याकेमाःगु धयादिसें कोइरालां अथेमजुसाः संविधानसभाया म्याद निदँ थप याःसां संविधान निर्माण मजुइगु धयादिल ।
वय्कलं माओवादी इलय् हे संविधान जारी याकेमबीगु षड्यन्त्र जुयाच्वंगु द्वपं बियादिल ।
अथेहे वय्कलं शान्ति प्रकृयाया अगुवा मदुम्ह कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' दथुइ लडाकु समायोजन यायेगु ल्याः स्वद्वं निसें न्याद्वं तक यायेगु सहमति जूगु धयादिल । वय्कलं झिंगुद्वं हे लडाकु समायोजन यायेमाःगु धया: माओवादीं गिरिजाबाबु नाप याःगु सहमतिया उल्लंघन याःगु द्वपं बियादिल ।
