संविधानसभाया म्याद तनेगु एमालेया प्रस्ताव
नेकपा (एमाले)या संसदीय दलया बैठकं इलय् हे संविधान जारी जुइमफइगुलिं संविधानसभाया म्याद तनेगु प्रस्ताव याःगु दु ।
एमालेया सोमवाः च्वंगु संसदीय दलया बैठकं जेठ १४ लिपाः देशय् गम्भीर संवैधानिक संकट वयेफइगु धासें अज्याःगु निकासया सार्थक उपाय मालेत नेतृत्वनाप इनाप याःगु दु । बैठकं जेठ १४ लिपाः देशय् संवैधानिक व राजनीतिक रिक्तताया अवस्था सिर्जना जुइमबीगु निंतिं तत्काल उपयुक्त संवैधानिक उपाय मालेत सार्थक पहल यायेत अपरिहार्य जूगु प्रस्ताव पारित याःगु दु ।
अथेहे बैठकं संविधानया विषयलय् दलत दथइ खनेदुगु सम्वादहीनतां जटिलता अप्वयेकूगु धासें राष्ट्रिय सहमति निर्माणय् क्रियाशील जुइत राजनीतिक दलतय्त इनाप याःगु दु । नापं संविधान जारी यायेत व राष्ट्रिय सरकारया निर्माणया निंतिं दलत दथुइ सहमति कायम जुइमाःगु निष्कर्ष एमालें पिकागु दु ।
एमालें दिगो शान्ति व लोकतान्त्रिक संविधान निर्माण याये व राष्ट्रिय सहमतिया सरकार निर्माण यायेत थःगु दलं लचकाया साथ अधिकतम योगदान यायेत संविधानसभा दल प्रतिबद्ध जूगु खँ प्रस्तावय् न्ह्यथंनातःगु दु ।
थःगु हे पार्टी दुने सरकार विघटनया माग यासें हस्ताक्षर अभियान न्ह्यायेवं सःतुगु एमाले संसदीय दलया बैठकं वर्तमान सरकारप्रति समर्थन जारी जूगु व पार्टी एकतावद्ध दुगु संकल्प याःगु दु । वंगु चैत २८ निसें सिंहदरवार स्थित पुलांगु प्रतिनिधिसभा भवनय् न्ह्याःगु एमाले संसदीय दलया बैठकय् संस्थापन पक्ष सभासद्तय्सं सरकार विघटनया माग याःगु खःसा सरकार पक्षया सभासद्तय्सं संविधान निर्माण यायेमाःगुलिं सरकार विघटन यायेमज्यूगु धासें सरकारया बचाउ याःगु खः ।
बैठकया लिप्पांगु न्हि सोमवाः प्रधानमन्त्री माधवकुमार नेपाल व अध्यक्ष झलनाथ खनालं सभासद्तय्सं न्यंगु न्ह्यसःया लिसः बियादीगु खः ।
