बैतडीलय् झाडाबान्तां सीपिनि ल्याः खुम्ह थ्यन

बैतडीया उत्तरपूर्वी क्षेत्रया न्हय्गूलिं मल्याक गाविसय् न्यंगु झाडाबान्तां स्वन्हुइ खुम्ह सीगु दु । झाडाबान्ताया कारणं शनिवाः न्याम्ह सीगु खःसा सोमवाः सुथय् थप छम्ह सीवं सीपिनि ल्या खुम्ह थ्यंगु दु ।

सोमवाः सुथय् सिगास-४ बसाडीया गणेश साउँदया म्हयाय् बिनिता साउँद सीगु खः । अथेहे झाडाबान्तां शनिवाः सिगास-६ रक्सौनया न्यय्गुदँया कित्थे धामी, सिगास-५ बुढाकोटया खुइदँया भागादेवी धामी, शिवलिङ-८या गोबडे धामी, थलाकाँडा-४या न्यय्दँया पतिदेवी धामी व गाजरी-५ धौलाडीकीया स्वीस्वदँया देवकी धामी सीगु खः ।

अन झाडाबान्ता पाखें प्रभावित जूपिनिगु स्वास्थ उपचारया अभावया कारणं इपिं सीगु खँ धाःगु दु । छवाः न्ह्यः निसें न्यंगु झाडाबान्ताया कारणं नीम्ह स्वयां अप्वा प्रभावित जूगु दुसाः बिरामीतय् ल्याः अप्वया वनाच्वंगु खँ सीदुगु दु ।