१४ गते प्यंगू थासं जुलुस पिकयाः संविधानसभा घेराउ
किपुलिइ न्हियान्हिथं प्रचार अभियान
येँ (सन्ध्या टाइम्स)/क्वःछिनातःगु इलय् हे न्हूगु संविधान जारी यायेमाःगु नापं नेवाः स्वायत्त राज्य सुनिश्चित यायेमाःगु माग यानाः नेवाः स्वायत्त राज्य मंकाः संघर्ष समितिया ग्वसालय् वइगु बैशाख १४ गते संविधानसभा भवन घेराउ ज्याझ्वलय् ब्वति कायेत स्वनिगः व स्वानिगलंपिनेया नेवाःत थाय् थासय् मुनाः मू मू कथं प्यंगू थासं जुलुस पिकयाः प्यखेरं घेराउ याइगु जूगु दु ।
मंकाः संघर्ष समितिया म्हिगः च्वंगु मुँज्यां संविधानसभा घेराउ यायेगु नितिं येँया बसन्तपुर, बौद्ध, यलया शंखमुल व कोटेश्वर लागां प्यंगू ततःधंगु जुलुस पिकायेगु क्वःछिउगु दु।
येँ व किपूया नेवाःत वसन्तपुरय् मुनाः जुलुस यानाः संविधानसभाया पूर्वपाखे, यलया नेवाःत शंखमुलय् मुनाः उत्तरपाखे, ख्वप व थिमिया नेवाःत कोटेश्वरय् मुनाः पश्चिमपाखे अले तोखा, जोरपाटी, सक्व नापं अन जःखःया नेवाःत बौद्धय् मुनाः संविधानसभाया दक्षिणपाखे च्वना घेराउ यायेगु क्वःछिउगु दु। अथे हे बैशाख १३ गते येँया असनं केन्द्रीकृत मसाल जुलुस पिकाइगु जूगु दु ।
थ्व हे झ्वलय् किपूया नेवाः स्वायत्त राज्य मंकाः परिषदं न्हियान्हिथं हे प्रचार अभियान न्ह्याकाच्वंगु दु। मंकाः परिषदं म्हिगः किपू नगरया थीथी मिसा पुचःया सकलें प्रतिनिधितय् दथुइ सहलह मुँज्या याःगु दुसा थौं बाघभैरव लागाय् ल्याय्म्हतय्गु भेला यायेत्यंगु दु। अथे हे कन्हय् च्वबहाः लागाय् व क्वारय् ल्याय्म्ह भेला नापं नगामय् नेवाः कलाकारतय्गु भेला, ९ गते भाजंगालय् , १० गते च्वबाहाः लागाय् व ११ गते लाय्कुलिइ प्रचारसभा याइगु जूगु दु ।
वैशाख १४ गते संविधानसभा घेराउ
येँ (सन्ध्या टाइम्स)/बैशाख १४ गते संविधानसभा घेराउ यायेगु ज्याझ्वः ताःलाकेत थौं नेवाः स्वायत्त राज्य मंकाः संघर्ष समितिं नेवाः कलाकारतय् दथुइ सहलह ज्याझ्वः याइगु जूगु दु। अथे हे कन्हय् नेपालभाषा ख्यः व राजनीतिक पार्टीया नेवाः कार्यकर्तातलिसे सहलह ब्याकीगु जूगु दुसा छुं दिं लिपा हे नेवाः व्यापारीतलिसे सहलह ब्याकेगु जुइ धकाः मंकाः संघर्ष समितिया नायः सुजिव वज्राचार्यं कनादीगु दु ।
