सरकार युद्धया मनस्थितिइ : अनन्त
एकीकृत नेकप (माओवादी)या स्थायी समिति दुजः वर्षमान पुन 'अनन्तं' नेपाली सेनां सैन्य भर्नाया निंतिं आह्वान याःगुयात शान्ति प्रकृया व संविधान निर्माण स्यंकेगु षड्यन्त्रं प्रेरित जूगु द्वपं बियादीगु दु । वय्कलं थःम्ह थुकीया निंतिं सेनायात दोष मबीगु धयादिसें थ्व सरकारया शान्ति प्रकृया स्यंकाः युद्धय् वनेगु कुतः जूगु दाबी यानादिल ।
सोमवाः येँय् जनसंचार अभियानं ग्वसाःग्वःगु पत्रकार सम्मेलनय् वय्कलं सरकार युद्धया मनस्थितिइ दुसां थःपिंसं उगु उदेश्ययात पूवंके मबीगु धयादिल । माओवादीं तत्काल उत्तेजनात्मक ज्याझ्वः मयायेगु खँ धयादिसें नेता अनन्तं सरकारयात भर्ना प्रकृया दिकेत इनाप यानादिल ।
थुगु प्रक्रिया शान्ति सम्झौता विपरीत जूगु टिप्पणी यानादिसें वय्कलं सर्वोच्च अदालतय् थुकीया बारे मुद्दा बिचारधीन जूगु इलय् सरकारं एकपक्षीय रुपं निर्णय यानाः अदालतया मानहानी याःगु जक मखसें राज्ययात दुर्घटना पाखे घ्वानछ्वयेगु ज्या यानाच्वंगु द्वपं बियादिल ।
वय्कलं जेठ १४ गते संविधान जारी मयायेगु, संविधानसभायात भंग यायेगु व बाध्यात्मक अवस्थाय् सेनायात माओवादी विरुद्ध छ्यलाः शान्ति प्रकृयायात भंग यायेगु षड्यन्त्र कथं सैन्य भर्ना चायेकूगु धयादिल । वय्कलं थुकी सरकार, इतिहासं हुइधुंकूपिं व दक्षिणपन्थी शक्तितय् मिलेमतो दुगु द्वपं नं बियादिल ।
