पार्टीं ग्वाहालि मयागुलिं थाकुल : प्रम
प्रधानमन्त्री माधवकुमार नेपालं थःगु हे पाटीं आवश्यक ग्वहालि मयागुलिं सरकार संचालन यायेत थाकूगु खँ धयादीगु दु ।
नेकपा (एमाले)या जारी संसदीय दलया बैठकय् सोमवाः सभासद्तय्सं न्यंगु न्ह्यसःया लिसः बियादिसें प्रधानमन्त्री नेपालं सरकारं बांलागु ज्या यायेगु योजना दयेकूसां पार्टीं उकी ग्वहालि मयागुलिं बिचाः याःगु कथं ज्या यायेमफुगु धयादिल ।
वय्कलं सरकारं याःगु चिधंगु गल्तीयात नं पार्टीया हे नेतातय्सं तःधंगु विषय दयेकूगु प्रति आपत्ति प्वंकादिल । वय्कलं सभासद्तय्त देया परिस्थिति थुइकाः न्ववायेत नं इनाप यानादिल । संक्रमणकालय् वर्तमान सरकार गठन जूगु धयादिसें वय्कलं सभासद्तय्सं सामान्य अवस्थाय् थें सरकारया गतिविधिया अपेक्षा याःगुलिं समस्या वःगु धयादिल ।
थ्वस्वयां न्ह्यः बैठकय् न्ववाःपिं अधिकांश सभासद्तय्सं प्रधानमन्त्रीया तच्वकं कुंखिंगु खःसा वर्तमान सरकार विघटन यानाः राष्ट्रिय सहमतिय सरकार गठन यायेमाःगु माग याःगु खः ।
