सेनां न्हू भर्नाया निंतिं आह्वान
नेपाली सेनां थीथी प्राविधिक पदया निंतिं भर्ना आह्वान याःगु दु । सेनां जंगी अड्डाया कार्यरथी विभाग, भर्ना छनौट निर्देशनालय अधिकृत, पदिक व प्राविधिक अमल्दार यानाः २७१ पदय् खुल्ला प्रतिस्पर्धा पाखें भर्ना आह्वान याःगु दु । सेनां नेपाली सेनाया स्वीकृत दरबन्दी दुनेया खाली पदय् शान्ति सम्झौता जूगु इलय् कायम जूगु ल्याःयात आधार कयाः उगु ल्याः अप्व मजुइगु कथं दरखास्त आह्वान याःगु खँ न्ह्यथंगु दु ।
न्हूगु भर्ती सम्बन्धी राजनीतिक व कानुनी विवाद यथावत दुगु इलय् सेनां हानं न्हूगु भर्नाया आह्वान याःगु दु । विस्तृत शान्ति सम्झौताया दफा ५या उपदफा १या निगूगु बुँदाय् तत्कालीन विद्रोही माओवादी व नेपाली सेनां निगूलिं पक्षं थप सैन्य भर्ति मयाइगु खँ न्ह्यथंनातःगु दु । थुकीया बारे हे सेना व माओवादी दथुइ ताः ई न्ह्यः निसें विवाद जुयाच्वंगु दु ।
दच्छि न्ह्यः सेनां भर्ना प्रकृयाया आह्वान यायेवं कानुनी रुपं नं थुकीया बारे विवाद ब्वलंगु खः । थुकीया बारे सर्वोच्च अदालतय् लाःगु रिटय् तत्कालीन वरिष्ठ न्ययाधीश अनुपराज शर्मां भर्ना प्रकृया दिकेत अन्तरिम आदेश ब्यूगु खःसां उकी न्यायाधीशतय् मत पाःगु खः ।
अथेहे उगु निर्णयया छुं लिपाः आःया प्रधानन्ययाधीश रामप्रसाद श्रेष्ठ लगायत न्यायाधीशया इजलासं थप सैन्य भर्ती बारे परिभाषा यासें शान्ति सम्झौता जूगु इलय् दुगु ल्याः अप्व मजुइकथं पदपूर्ति यायेदइगु निर्णय न्यंकूगु खः ।
थुकीया बारे अन्तिम निर्णय वैशाष २२ गते जुइगु ज्याझ्वः दु ।
