कांग्रेसं १०४९ कार्यकर्तातय्त सहिद घोषणा यायेत माग
नेपाली कांग्रेसं सशस्त्र द्वन्द्वया इलय् माओवादीं स्याःपिं थःगु ९३४ म्ह कार्यकर्तात नापं राज्य व मेगू थीथी पुचलं स्याःपिं यानाः मुक्कं १०४९ कार्यकर्तायात सहिद घोषणा यायेमाःगु माग याःगु दु ।
आइतवाः प्रधानमनत्री माधवकुमार नेपालयात नापलानाः कांग्रेसया नेतातय्तसं द्वन्द्वया इलय् स्याःपिं कार्यकर्तातय्त सहिद घोषणाया माग याःगु खः । अथेहे कांग्रेस नेतातय्सं द्वन्द्वया इलय् थीथी पुचलं स्याःपिं एमालेया १६३, राष्ट्रिय प्रजातन्त्र पार्टीया ९५ व मेमेगू दलया १९ म्ह कार्यकर्तायात नं सहिद घोषणा यायेत माग याःगु दु ।
कांग्रेस केन्द्रीय दुजः विनयध्वज चन्दया संयोजकत्वय् गठन याःगु शान्ति प्रकृया व द्वन्द्व पीडित अनुगमन व समन्वय समितिं तयार याःगु प्रतिवेदनया आधारय् द्वन्द्वया इलय् सीपिंत सहिद घोषणा यायेमाःगु माग याःगु खः । २०६५ साल असोज १७ गते गठन जूगु उगु समितिलय् कांग्रेस महामन्त्री केबी गुरुङ, गोविन्दराज जोशी, लक्ष्मण घिमिरे व सुनिल भण्डारी दुजः कथं च्वनादीगु खः ।
अथेहे प्रधानमन्त्री नेपालयात थःपिंसं तयार याःगु प्रतिवेदन लःल्हासें कांग्रेस नेतातय्सं सशस्त्र द्वन्द्वया इलय् सीपिंत सहिद घोषणा लगायत विस्थापितयात छेँ लिहांवनेगु वातावरण मिले यायेत नं माग याःगु दु ।
