एमाले अध्यक्ष व प्रमं सोमवाः जक लिसः बीगु
नेकपा (एमाले)या संसदीय दलया बैठकय् प्रधानमन्त्री माधवकुमार नेपाल व पार्टी अध्यक्ष झलनाथ खनालं सोमवाः जक सभासद्तय् न्ह्यसःया लिसः बीगु जूगु दु । आइतवाः हे बैठकय् सभासद्तय्सं थःथःगु बिचाः प्वंकेगु ज्याझ्वः क्वचाःगु खःसां प्रम नेपाल व अध्यक्ष खनालं सोमवाः सुथय् च्यतात्याः इलय् च्वनीगु बैठक जक लिसः बियादी ।
बैठकय् सभासद्तय्सं इलय् हे संविधान जारी मजुइगु प्राय निश्चित जुइधुंकूगुलिं संविधानसभाया ई तनेत राष्ट्रिय सहमति दयेकेत नेतृत्वं पहल यायेमाःगु खँ धाःगु दु । नापं इमिसं जेठ १४ लिपाः निर्माण जुइगु वातारण प्रति नेतृत्व गम्भीर मजूगु धासें पार्टी नेतृत्वया कुंखिंगु खः । अथेहे सभासद्तय्सं संविधानया ई तनाः पार्टी संविधान निर्माणय् केन्द्रीत जुइमाःगु खँ बः ब्यूगु दु ।
आइतवाः न्ववाःपिं अधिकांश सभासद्तय्सं सहमतीय प्रणाली कथं सरकार गठन यायेमाःगु बिचाः प्वंकूगु दु । सभासद्तय्सं सहमतीय सरकार निर्माण पाखे वनेत पार्टी नेतृत्वयात दबाब ब्यूगु दु । बहुमतीय सरकारं शान्ति प्रकृया व संविधान च्वयेगु ज्या पूवंकेमफइगु धासें सभासद्तय्सं दक्वं राजनीतिक दलयात दुथ्याकाः राष्ट्रिय सरकार दयेकेमाःगु खँय् बः ब्यूगु खः ।
सरकार पक्षधर सभासदतय्सं धाःसा संविधान निर्माणय् सरकार केन्द्रीत जूगुलिं तत्काल सरकार विघटन यायेमज्यूगु खँ तःगु खः । संस्थापन पक्षधर सभासद्तय्सं धाःसा आःया इलय् सहमतीय सरकार अपरिहार्य आवश्यकता जूगु धासें बहुमतीय सरकारं राजनीतिक गतिरोध समाधान यायेमफइगु दाबी याःगु खः ।
अथेहे सभासद्तय्सं गृहमन्त्री भीम रावलया दम्भ व व्यहवारया कारणं वंगु शुक्रवाः थःगु हे पार्टीया झापाया कार्यकर्ता डिकेन्द्र राजवंशी आत्माहत्या यायेमाःगु धासें गृहमन्त्री रावलया कुंखिंगु दु । गृहमन्त्री रावलं धाःसा संचार माध्यमय् वःगु कथं थःम्हं व्यवहवार मयानाःगु व नियमया पालना मयासें थःम्हं सुयातं जागीर बीमफइगु धयादिल ।
