छेँ मिं नःपिं नेवाःतय्गु निंतिं ग्वाहालि यायेत समिति
येँ (सन्ध्या टाइम्स)/वंगु शुक्रवाः येँया इतुंबहालय् नेवाःतय्गु न्याखा छेँ मिं नःगुलिं इमित ग्वाहालि यायेगु नितिं नेवाः राष्ट्रिय मुक्ति मोर्चा, नेवाः जागरण मञ्च, ताहाननि परिवार व स्टार क्लब जानाः छगू सहयोग समिति दयेकूगु दुसा उगु समितिं शनिवाःनिसें हापं म्हयेगु ज्या न्ह्याकूगु दु ।
नेवाः मोर्चाया अमर बज्राचार्य, नेवाः जागरण मञ्चया मुकेश मास्के, स्टार क्लबया चन्द्रकुमार महर्जन व ताहाननि परिवारया सुरज महर्जन च्वनाः उगु समिति दयेकूगु खःसा समितिया कजि येँ महानगरपालिका वडा नं. १८या पुलांम्ह वडा नायः चन्दानन्द नेवाः जुयादीगु खः ।
उगु समितिं छेँ मिं नयाः पीडित जूपिंत न्यासलं अप्वः आर्थिक ग्वाहालि याःपिनिगु नां नेपालभाषाया न्हिपौ सन्ध्या टाइम्स, झीगु स्वनिगः, अप्सरा वाःपौ नापं मेमेगु नेपालभाषाया पत्र पत्रिकाय् पिथनेगु जुइ धकाः नं धाःगु दु। अथे आर्थिक रुपं ग्वाहालि यायेत थाय्मदुया मंकाः धुकुतिइ खाता चायेकीगु जूगु दु। समितिं शनिवाः छन्हुं हे ४७ द्वः दां म्हयेगु धुंकूगु दु ।
थ्व हे झ्वलय् शनिवाः उगु समितिं पीडित नेवाःतय्गु च्वनेगु व नयेगु ब्यवस्था याःगु दु। वंगु शनिवाः छेँ मिं नयाः भिन्द्यः महर्जन, तुलसीनारायण महर्जन, दबलमान महर्जन, आशामरु महर्जन व रामकृष्ण महर्जनया छेँ च्याःगु खः।
उगु समितिया थौं मुँज्या च्वनाः पीडित नेवाःतय्त आर्थिक रुपं ग्वाहालि यायेगु नितिं माःगु कथंया ज्याझ्वः तकं पितबीगु नापं आर्थिक व मेमेगु कथंया ग्वाहालि यायेत नं सकल नेवाःतय्त इनाप यायेगु जुइ धाःगु दु। वंगु शुक्रवाः सनिलय् इतुंबहाःया ताहाननिइ नेवाःतय्गु छेँ मिं नये धुंकाः नेवाः राष्ट्रिय मुक्ति मोर्चा येँ जिल्लाया नायः उमेश स्थापित, नेवाः जागरण मञ्चया कजि सुजिव बज्राचार्य नापं स्थानीय मनूतय्गु कुतलं थुगु सहयोग समिति दयेकूगु खः ।
वैशाख १४ गते संविधानसभा घेराउ
येँ (सन्ध्या टाइम्स)/बैशाख १४ गते संविधानसभा घेराउ यायेगु ज्याझ्वः ताःलाकेत थौं नेवाः स्वायत्त राज्य मंकाः संघर्ष समितिया मुँज्या च्वनीगु जूगु दु। अथे हे उगु घेराउ ज्याझ्वः ताःलाकेत म्हिगः नेवाः जागरण मञ्चं चियापान ज्याझ्वः याःगु खःसा नेवाः राष्ट्रिय मुक्ति मोर्चां सक्वय् नेवाः सांस्कृतिक सभा याःगु खः। अथे हे थौं किपुलिइ नेवाः स्वायत्त राज्य मंकाः परिषदं मिसातय्गु व मिजंतय्गु थीथी हे भेला याइगु जूगु दु ।
