महेन्द्र गुफाय् बाखं गोष्ठी

- विजयरत्न असंबरे

नेपालभाषाया बाखं विधायात च्वन्ह्याका यंकेगु तातुनाः बाखं दबू नीस्वंगु खः। थथे नीस्वंगु ताः ई नं मदुनि। दछि दत्याति हे तिनि दत। अनंनिसें लय्पतिकं बाखं मुँज्या न्ह्याना वयाच्वंगु दु। स्वनिगः दुने जक मखु, स्वनिगलं पिने पिने वनाः नं न्ह्याकल। थ्वहे झ्वलय् थ्वपालय् पोखरा थ्यन। अनया नेवाःतय् दथुइ थ्यन। अनया साहित्यकारतय् दथुइ थ्यन। थनं वंपिंसं नं बाखं ब्वन। अन च्वंपिंसं नं ब्वन। अन च्वंपिंसं नं नेपालभाषां हे बाखं ब्वंगुयात छगू च्वछायेबहःगु खँया रुपय् कायेमाः ।

थनं अन स्वीम्ह ति वंगु खः। नेवाः खलः कास्कीया ब्वनाय् अन थ्यंगु खः। अन नेवाःतय्गु पुलांगु बस्ती दु। वहे बस्तीया भैरव टोलया भैलद्यः छेँ नं दु। भैरव सांस्कृतिक संरक्षण समितिं उगु छेँया भाला कया वयाच्वंगु दु। व हे छेँया छकू तःधंगु क्वथाय् निन्हु यंकं बाखँ मुँज्या न्ह्यात। मुँज्याय् पोखरायाम्ह जेष्ठ नेवाः नागरिक सर्वज्ञमान प्रधानाङ्ग, नेवाः खलः कास्कीया प्रकाश पालिखे अले पोखराय् च्वनाः साहित्य सिर्जना याना वयाच्वंपिं सरुभक्त व तीर्थ श्रेष्ठनिसें कयाः नांजाःम्ह साहित्यकार लक्ष्मण राजवंशी व नर्मदेश्वर प्रधानपिंसं बाखं दबू व पोखरा यात्राया महत्व व उपलब्धी बारे थःथःगु नुगः खँ नं तयादिल ।

न्हापांगु दिं कुन्हु पोखराया गोविन्द ताम्राकार, गेहेन्द्र उदास, सुशिला जोशीपिंसं नेवाः भासं हे बाखं ब्वनाः न्यंकलसा कन्हय् कुन्हु सरुभक्तया खस भाय्या बाखं कवि तीर्थ श्रेष्ठं ब्वनाः न्यंकल। पोखराया बाखं च्वमिपिं अष्टमान प्रधानाङ्ग, उदयबहादुर अमात्यपिंसं नं बाखं ब्वनाः न्यंकल ।

थ्वपालय्या बाखं दबूया दकलय् च्वछायेबहःगु खँ धइगु महेन्द्र गुफा दुने च्वनाः न्ह्याकूगु बाखं मुँज्या खः। शायद अन जूगु थ्वहे न्हापांगु साहित्यिक मुँज्या जुइमाः धइगु खँ नं पिहां वल। थथे हे च्वछायेबहःगु मेगु खँया रुपय् पोखरा दुने खस नेपाली बाहेक छुं नं भाषाया बाखं मुँज्या जूगु थ्वहे न्हापांगु खः धकाः नं चर्चा जूगु खः ।

बाखं दबूया थां कथं कयातःपिं मध्ये राजा शाक्य थःगु ब्यस्तताया हुनिं पोखराय् मथ्यन। अथे हे संस्थापक सदस्यया रुपय् नां दुपिं लोचनतारा तुलाधर व रिना बानियाँ तुलाधरपिं नं पोखरा मथ्यन ।

पोखराय् जूगु बाखं मुँज्या थुलि बय्बय् जुल कि दमौलिपाखें नं अन छगू बाखं मुँज्या यायेत इनाप वल। अनया नेवाःतय्सं उलि नेवाःभाय् मल्हाः। अथे जूसां उमिसं ध्यान तयाः बाखं न्यन। पोखरां लिहां वयेगु झ्वलय् दमौलिया उद्योग वाणिज्य संघया हलय् उगु मुँज्या जनभावना मिसा खलः तनहुँया ग्वसालय् जूगु खः। मुँज्याया नायः खलःया प्रमृख शशिकला श्रेष्ठ जुयादीगु खः। येँय् उकुन्हु लिथ्यंके माःगुलिं यानाः दमौलीइ लक्ष्मण राजवंशी, गोविन्दमान प्रधान, केदार सितु व शशिकला मानन्धरं जक बाखं ब्वंगु खः ।

थुकथं क्वचाःगु बाखं दबूया पोखरा यात्रा छगू हुइ मफइगु लुमन्ति जुया बिउगु दु। अले थज्याःगु पलाः न्ह्याका हे च्वनेगु तातुना आः बन्दीपुर व नगरकोटय् नं मुँज्या यायेगु ग्वसाः बाखं दबुलिं ग्वयाच्वंगु दु ।