बैशाख १४ या निंतिं ख्वपय् मुँज्या

ख्वप (सन्ध्या टाइम्स)/नेवाः स्वायत्त राज्य सुनिश्चिता व संविधान जारी यायेगु क्वछिना ई जेठ १४ गते हे जारी यायेमाःगु माग यासें नेवाः स्वायत्त राज्य मंकाः संघर्ष समिति ख्वप लागाया ग्वसालय् वंगु शुक्रवाः छगू सहलह मुँज्या जुल ।

साहित्यकार भाजु तिलकप्रकाश कायस्थया सभापतित्वय् जिल्ला प्रशासन कार्यालय भवनय् जूगु मुंज्याय् नेवाः देय् गुथिया नायः नरेन्द्रभक्त हाडां क्वछिनातःगु इलय् हे संविधान जारी जुइमाःगु व संविधान पुनःर्संरचना आयोग गठन यानाः जनतायात ध्वं ल्हायेगु ज्या याना वयाच्वंगुलिं नेपाःया आदिवासी जनजातित सचेत जुइमाःगु खँ धयादिल। विराट गुथिया छ्याञ्जे भाजु महेन्द्र गोपाल कर्माचार्यं जनआन्दोलनया लिच्वः कथं प्राप्त संघीय लोकतान्त्रिक गणतन्त्र व धर्मनिरपेक्षतायात छुं नं कथंया लिच्वः मलाकेत होशियारी यानादिल। यदि छुं कथंया उखेथुखे जुल धाःसा जनपक्षीय साहित्य, भाषा व जनसंस्कृतिया निंतिं पीच्यादँ न्ह्यवनिसें संघर्ष याना वयाच्वंगु विराट गुथिं ल्हाःप्वःचिना मच्वनिगु खँ नं कुलादिल। मुँज्याय् बाखं च्वमि रामशेखर, नेवाः राष्ट्रिय मुक्ति मोर्चा ख्वपया कजि सुनिल बासु, श्यामकृष्ण कोजु, सुन्दरकृष्ण थापिंसं नं थःथःगु नुगः खँ प्वंकादीगु खः ।

उगु मुँज्याय् संघर्ष समिति ख्वप लागाया कजि हिरण्यप्रताप सांगामीं देशय् खनेदया वयाच्वंगु व राज्यं हाकनं धर्म व भाषाया ख्यःयात उत्पीडनय् लाके फइगु सम्भावनायात कयाः होशियारी याकेगु कथं जूगु थुगु ज्याझ्वःया नापं जेठ १४ गते पूर्ण संविधान जारी हे याये माःगु माग यासें थ्व हे बैशाख १४ गते न्हिनसिया २ ताः इलंनिसें संविधान सभा घेराउ यायेगु ज्याय् सकसितं उपस्थिति व ग्वहालिया निंतिं इनाप याना दिल। थ्व हे झ्वलय् बैशाख १० गते ५ ताः इलय् ख्वपया दत्तात्रयय् छगू सभा नं याइगु जूगु दु ।